968, 17 mai. — Laon.
Lothaire, à la prière de sa mère Gerberge et de l'archevêque de Reims Oudri, autorise Sonier à diriger, sa vie durant, simultanément les deux abbayes de San Paul de Mar et de San Feliu de Guixols, dont il confirme les possessions et les privilèges.
A. Original perdu.
B. Copie du xviie s., Bibliothèque nationale, Collection Baluze, vol. 107, fol. 362, d'après l'ancien Cartulaire de San Felia de Guixols, fol. 21 v°.
C. Copie du xviie s., Bibliothèque nationale, Collection Baluze, vol. 238, fol. 304, d'après a.
a. Antonio de Yepes, Coronica general de la orden de San Benito, t. III, Appendix, escritura 21, p. 27, probablement d'après le même cartulaire que B.
b. Marca, Marca Hispanica, Appendix, col. 891, d'après le même cartulaire que B.
c. Recueil des historiens de la France, t. IX, p. 632, n° xxii, d'après b.
Indiqué : Mabillon, Annales ordinis S. Benedicti, XLVII, 34, t. III, p. 597.
Indiqué : Bréquigny, Table chronologique, t. I, p. 443.
Indiqué : Böhmer, Regesta, t. I, p. 194, n° 2046.
In nomine sanctae et individuae Trinitatis. Lotharius, divina propitiante clementia Francorum rex. Si sanctae ecclesiae loca, ut dignum est, stabilimus auctoritate regia, id nobis procul dubio ad mortalem vitam temporaliter exigendam et ad aeternam feliciter obtinendam profuturum esse confidimus. Quocirca notum sit omnibus, praesentibus scilicet et futuris, fidelibus quendam religiosum abbatem, nomine Soniarium, olim a partibus Gothici regni advenientem, serenitatis nostrae praesentiam, conducente fideli nostro Odelrico, Remorum metropolis archiepiscopo, adisse sibique regiae authoritatis praeceptum super duobus monasteriis a nobis fieri postulasse, quorum quidem alterum, in honore sancti Pauli consecratum, situm est in comitatu Gerundensi, in loco qui dicitur Maritima, alterum vero in honore sancti Felicis in eodem comitatu, in loco qui dicitur Jecsalis. Placuit itaque celsitudini nostrae ejusdem abbatis petitioni annuere et, ex consilio gloriosae genitricis nostrae domnae Gerbergae sublimis reginae, suggerente etiam praefato archiepiscopo aliisque fidelibus nostris, pro Dei amore ejusque sanctorum honore et aeterna retributione rem istam regaliter efficere, tali videlicet modo ut idem abbas Soniarius eadem duo monasteria, dum ipse in carne vixerit, quia de ipsis duobus unius benedictionis electionem suscepit, simul habeat in manu et potestate sua, regulariter sibi commissa gubernans et animarum lucris studiose invigilans; post decessum vero ejus, separatione ab invicem facta, singulis coenobiis singuli praesint et magis prosint abbates, ad nullum principem nisi ad solum regem Franciae respicientes et secundum regulam sancti Benedicti ibidem regulariter conversantes, animas Deo verbis et factis lucrantes, fructum boni operis in sancta religione pie exercentes, ut ex ovibus suae curae commendatis mereantur habere gratiam aeternae mercedis. Praedicta autem monasteria res omnes quas habent vel quaecumque in posterum, Deo auxiliante, habitura vel acquisitura sunt regiae institutionis decreto sublimiter ordinamus atque legaliter statuimus ut in perpetuum jure quieto inviolabiliter absque ulla contradictione sub reverentia ecclesiasticae dignitatis habeant et sine fine possideant et cum omni rerum suarum integritate tranquilla et immota permaneant: monasterium igitur sancti Pauli, alodia sua, hoc est in Lavendarias et in Parietes et ipsum alodum quod Elias dedit sancto Paulo et Corron, quod dedit ei Audegarius vicecomes; at monasterium sancti Felicis, alodia sua et ecclesias suas, hoc est Fenalis cum ecclesia sanctae Mariae et Bierto cum ecclesia sancti Martini et Olivos et valle Lubrica et Romaniano in valle Araze et in Colonico et in Spanitate et in Vallense comitatu; et quidquid praedicta monasteria unquam habuerunt aut habent in praedictis locis et praenominatis comitatibus vel quodcunque, Deo adjuvante, in posterum acquirere sibi potuerint, totum hoc, ut dictum est, firmissime et semper teneant. Insuper et hoc praedictis monasteriis regali licentia concedo et pro Dei amore relaxo ut nullum unquam censum vel debitum de aliqua rerum suarum possessione alicui persolvant, sed libere omnia sua nostra regali absolutione possideant et nulli unquam alteri nisi solum regali subdita sint potestati. Caeterum si quis in futurum huic regiae auctoritatis praecepto aliquam controversiam forte inferre tentaverit, omni emendatione congrua secundum legem ecclesiasticam Deo et sanctis ejus ob hoc satisfaciat, et reus majestatis temeritatis suae, poenas exinde persolvat, immo et sic hujus auctoritatis nostrae decretum inviolabile permaneat semper et firmum. Ut autem hoc ipsum perpetua stabilitate perduret jugiter inconcussum, manu propria corroboravimus et sigillo nostro muniendum mandavimus.
Actum apud urbem Lugdunensem, .XVI. kalendas junii, anno incarnationis dominicae .DCCCCLXVIII., domno vero Lothario rege glorioso regnante decimo sexto, indictione decima.
Signum domini Lotharii regis gloriosissimi.
Gezo cancellarius ad vicem domini Odelrici, archiepiscopi summique cancellarii, recognovit et subscripsit.
Datum praedicto kalendarum die. In Dei nomine. Foeliciter. Amen.