1121, 9 décembre. — Nicastro.
Pièce complémentaire
Lettre de Calixte II à Louis VI, lui annonçant qu'il consent à confirmer l'union des diocèses de Noyon et de Tournai, pourtant fort distants l'un de l'autre et susceptibles d'entretenir, chacun, un évêque et qu'il fixe à Noyon le siège de cet évêché, confié à Lambert.
[Pas de tableau de la tradition.]
Calyxtus episcopus, servus servorum Dei, karissimo in Christo filio Ludovico, illustri et gloriosissimo Francorum regi, salutem et apostolicam benedictionem. Patres tui, gloriose memorie Francorum reges, postquam per omnipotentis Dei misericordiam christiane fidei rudimenta perceperunt, Romanam Ecclesiam devotione precipua coluerunt, nec satis eis visum est matrem suam suis tantum temporibus venerari, sed ejus reverentiam, obedientiam et affectum suis etiam posteris, jure quodam hereditario, reliquerunt. Unde divine inspirationis gratia factum est ut et tu qui, ex eadem regali descendens progenie, in regni ejus regimine successisti, in morum quoque probitate succedens, et in devotione supradicte matris tue heres ingenuus permaneres. Hoc et nos diebus nostris experti sumus, hoc et tota Romana pene Ecclesia recognoscit. Eapropter petitiones tuas, fili karissime, clementer admittere ac personam tuam et regnum specialius, auctore Deo, decrevimus honorare. Postulas siquidem ut antiquam Noviomensis ac Tornacensis parrochiarum unitatem auctoritatis nostre robore confirmemus. Multa siquidem et magna inter utramque ecclesiam terrarum spatia continentur et suum queque, ut asserunt, posset antistitem obtinere. Sed quoniam dilectionis tue habundantia nos compellit, petitioni huic facilem impertimur assensum. Noviomensis igitur et Tornacensis ecclesiarum et parrochiarum unitatem, a nostris predecessoribus inconvulsam usque ad hec tempora conservatam, presentis decreti pagina confirmamus et ratam in perpetuum permanere decernimus, auctoritate apostolica statuentes ut utrique ecclesie unus tantum presit episcopus, verumtamen caput, et episcopalis dignitatis sedes Noviomi futuris temporibus habeatur. In hiis omnibus confratrem nostrum, Lambertum episcopum, sollicitiorem existere volumus et sic per Dei gratiam utrique ecclesie providere, ut neutra pastoralis officii et doctrine gratia defraudetur. Si qua igitur in futurum ecclesiastica secularisve persona hanc nostre institutionis paginam sciens contra eam temere venire temptaverit, secundo terciove commonita, si non satisfactione congrua emendaverit, potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo corpore ac sanguine Dei et Domini Redemptoris nostri Jhesu Christi aliena fiat atque in extremo examine districte ultioni subjaceat. Cunctis autem eam servantibus sit pax Domini nostri Jhesu Christi, quatinus et hic fructus bone actionis percipiant et apud districtum Judicem premia eterne pacis inveniant. Amen. Amen. Amen. Ego Calyxtus, catholice Ecclesie episcopus, laudans subscripsi. Datum Neocastri, per manum Grisogoni, sancte Romane Ecclesie diaconi cardinalis ac bibliothecarii, V idus decembris, indictione XV, Incarnationis dominice anno M°C°XX°II°, pontificatus autem domni Calyxti secundi pape anno III°.