1074, après le 4 août – 1075, avant le 4 août. — Paris.

Quisquis fidelium, ardore succensus adimplendae preceptionis evangelicae, qua cuncti divicias habentes misericorditer admonentur facere sibi de mammona iniquitatis amicos, a quibus, cum defecerint, in aeterna tabernacula recipiantur, omnium necessitatibus communicare studuerit indigencium precipueque pauperum spiritu, quorum, juxta Veritatis vocem, regnum dinoscitur esse caelorum, ut deficientes ab hujusmodi videlicet amicis in mansiones excipiantur aeternas, noverit se indubitanter non solum a sui receptione non esse frustrandum sed etiam ab ipso bonorum omnium largitore, qui ei contulit unde sibi tales faceret amicos, se esse inter gloriosiores beatitudinis atque premia perennia percepturum. Hac igitur salubri consideratione ego Gauffredus, saeculari miliciae mancipatus, sollicitatus, disposui aliquid ex his, quae temporaliter accepi, per manus pauperum, fideli Deo lege foenoris committere, quod post tempus in aeterna retributione centena merear multiplicatione recipere. Quod ut probabilius fieri possit, illud egregium pauperum genus elegi ad hoc faciendum, quod sub Alberto abbate in Turonensi coenobio, quod Majus Monasterium dicitur, omnipotenti Deo famulatur, quod, ut liberius expeditiusque Deo serviret, propriis abrenuncians facultatibus, voluntariam subiit paupertatem. Ut autem quantitatis sive integritatis earumdem rerum, quas per manus predictorum fratrum omnipotenti Deo offero, omnis propellatur ambiguitas, earum nomina scripto huic inserere jussi, id est Basenivillam cum omnibus suis pertinentiis, ecclesiam in eadem villa et omnia que ad ipsam pertinent ecclesiam ; in eadem villa, omnimodam justiciam cum omnibus ad justiciam pertinentibus, culta insuper et inculta, prata et silvas necnon et medietatem unius molendini siti super aquam quae nuncupatur Salceron ; preterea duos hospites et tres agripennos vinearum sitos aput villam quae vocatur Mainolium et decimam earum facultatum quas ibi nunc habeo, tam in segetibus quam in vineis ; insuper et omnia quae in eadem villa in meo videntur esse dominio, cum morte finiero. Adduntur etiam his tres prebende aput Versalias, una quarum sit in dominio, alias vero duas teneant duo canonici, ea scilicet ratione ut, cum eorum quis morte finierit, arbitratu et dispositione predictorum fratrum alter in loco ipsius subrogetur ; sepulturam quoque ipsius ville com omni integritate et mansiones Goscelini presbyteri simulque terram ubi vinea fuit necnon et altare de Bisconcellis, quod videtur habere de me frater meus Ursus, com morte finierit ; et quemdam colibertum, nomine Roscelinum, com omni sua familia, et decimam illius consuetudinis quam videor habere aput castrum quod nuncupatur Medanta simili modo huic cartule inserere cupivimus. Que omnia cum assensu et auctoritate mee conjugis, nomine Ermengardis, necnon et filiorum meorum, Simonis videlicet atque Amalrici simulque Gauffredi, et fratris mei Ursi, Milonis quoque et Guidonis, meorum seniorum, de Caprosis, de quorum beneficio haec sunt, sancto Martino Majoris Monasterii ad usum scilicet monachorum ibidem omnipotenti Deo famulantium concedens annuo et annuens concedo jure perpetuo possidenda, quatenus eorum qui elemosinis divine majestati placuerint mereamur adjungi consorcio. Et quicquid illis tribuo, liberum ab omni consuetudine exactionis vel vicarie seu ceterorum vectigalium facio, ita ut ab hodierna die sine ulla mea vel cujusquam successorum meorum contradictione liceat supradicte congregationi suisque successoribus cum abbatibus, qui eis pro tempore praeerunt, predicta sub sue tuitionis defensione jure perpetuo possidere, et quicquid inde agendum decreverint habeant potestatem faciendi, ordinandi et qualitercumque eis placuerit meliusque visum fuerit disponendi tam presentibus quam futuris temporibus. Nulla igitur secularis potestas, nullus, inquam, mortalium contra donationem istam venire aut aliquit attemptare presumat sed neque infra metas totius territorii nominate ville occasione alicujus justicie vel cujuscumque alterius exactionis personam aliquam vel aliquid aliud capere vel violenciam inferre attemptet. Si quis autem, quod absit, ex haeredibus nostris vel alia cujuscumque ordinis aut potestatis persona, diabolice suggestionis instinctu, hujus elemosine testamento inferre calumpniam temptaverit, et prave voluntatis effectum injusticie convictus obtinere non valeat et regi, qui pro tempore fuerit, auri libras .X. coactus exsolvat. Et ut hujus donationis cyrographum per cuncta annorum curricula vigorem perpetuitatis obtineat, Philippus, divina ordinante providentia rex Francorum augustus, per nostram deprecationem sua auctoritate firmavit et sue dignitatis sigillo consignare fecit suisque fidelibus, quorum nomina subscripta sunt, corroborandum tradidit.

Ꞩ. Gauffredi de Gomet.Ꞩ. Galerani, comitis de Mellent. Ꞩ. Simonis, filii ejus.Ꞩ. Gualcherii de Nealfo. Ꞩ. Amalrici, filii ejus.Ꞩ. Hugonis Rufi de Castroforti. Ꞩ. Gauffredi, filii ejus.Ꞩ. Nivardi Potini.  (Locus sigilli.) Ꞩ. Milonis, filii ejus.Ꞩ. Radulfi Burdonis. Ꞩ. Guidonis vicecomitis, filii ejus.Ꞩ. Hugonis de Baratonis. Ꞩ. Ursi, fratris Gauffredi.Ꞩ. Herberti de Teudonisvilla. Ꞩ. Ernaldi Osalis Bastardi, filii ejus.Ꞩ. Odonis, clerici de Gomez. Ꞩ. Simonis, nepotis ejusdem Gauffredi.Ꞩ. Gunterii, filii Normanni de Pissiaco. Ꞩ. Mainerii, fratris ejus.Ꞩ. Teudonis, filii Heirici, de Castrolandonis. Ꞩ. Rorici, generi ejusdem Gauffredi.Ꞩ. Hugonis, filii Odonis de Manta. Ꞩ. Gauffredi, filii Gundacri.Ꞩ. Hugonis, filii Normanni de Monteforti.

Actum publice Parisius, regnante Philippo rege anno [X]V^to.

Guillelmus, regis cancellarius, legi et subscripsi.