1207, du 1er novembre, au 5 avril 1208. — Fontainebleau.

In nomine sancte et individue Trinitatis. Amen. Philippus Dei gratia Francorum rex. Noverint presentes pariter et futuri quoniam genitor noster venerande memorie rex Ludovicus, apud Fontem Blaaudi, construens capellam suam in honore Dei et beate Virginis Marie et beati Saturnini, in hunc modum eam dotavit : domino Bartholomeo, qui primus illius ecclesie capellanus institutus est, et universis successoribus suis qui post dictum Bartholomeum ibidem deservierint, dedit et assignavit in perpetuum tres modios frumenti ad mensuram gastinensem in festo beati Remigii annuatim percipiendos in granchia apud capellam, et sex modios vini in clauso regio de Herici ad mensuram de Samois similiter annuatim recipiendos. Propter quos sex modios vini, quia predictum clausum ascensivimus (sic), in excambium damus et assignamus in perpetuum capellano ejusdem capelle quatuor libras percipiendas singulis annis in prepositura nostra Moreti, die Assumptionis beate Marie, ita quod si prepositus noster predictus quatuor libras die statuta eidem capellano non solverit, id nobis emendabit. Dedit etiam et assignavit apud Moretum quatuor libras de censu terre arabilis quam ipse genitor noster assensiverat Gilleberto de Braia, ita quod Gillebertus et quicumque post ipsum terram illam habuerit sacerdoti qui dicte capelle deservierit quatuor libras annuatim in festo sancti Remigii persolvet. Si autem possessor terre capellano die statuta non solverit, censum illum nobis emendabit. Capellanus vero in luminaribus capelle providebit. Concessit etiam genitor noster quod quidquid dictus Bartholomeus edificaret apud Fontemblaudi, sive in domibus, sive in arboribus, sive in vivario, sive in prato, in perpetuum capelle remaneret et illi qui capelle deserviret. Concessit preterea ut quicumque capellanus esset hujus capelle, usuarium suum in nemore competenter haberet ad ardendum et quotiens vel rex vel regina vel filius regius esset apud Fontemblaaudi, capellanus haberet liberationem suam integram, scilicet quatuor panes, dimidium sextarium vini et pro coquina duos denarios et tesam candele ; que omnia, sicut dicta sunt, benigne confirmantes concedimus et capelle pariter vineam quam plantavit Bartholomeus, et domum quam nos fieri fecimus ad opus capellani pro domo quam habebat infra muros nostre proprisie, et stabulum quod est juxta domum que fuit cancellarii confirmamus. Quia vero tempore nostro inter prefatum Bartholomeum et Gaufridum capellanum nostrum orta est contentio super missis celebrandis in illa capella dum moram facimus apud Fontemblaaudi et super oblationibus, ad omnium notitiam pervenire volumus quod ad nostram reportatam audientiam litem eorum decidentes, precipimus ut Bartholomeus et successores sui eorumque capellani liberam habeant potestatem missas ibi celebrandi singulis diebus, tam ante missam quam audiemus quam postea, si ante quod (sic) tantum fuerit temporis spatium quod missa possit celebrari. Quicumque missam celebraverit in illa capella, oblationes misse erunt capellani capelle, nisi tamen illius misse cui presentes affuerimus ; ejus misse oblationes capellani erunt nostri, aut illius misse cui regina presens affuerit, cujus misse oblationes erunt capellani regine, aut illius misse cui filius regius aderit, cujus misse oblationes erunt capellani sui, si capellanum habuerit. Sed sciendum quod si aliqua die contigerit nos ire venatum vel ad aliud agendum ita quod missam non audiamus in hac capella, capellanus noster aut ille quem voluerit loco sui poterit ibi unam celebrare missam quando voluerit, ita tamen quod per dilationes et nimias prestolationes non impediat aut detineat importune capellanum capelle et alios qui voluerint missas celebrare et illius misse erunt oblationes sue. Si autem contigerit nos eadem die post illam missam, in reditu nostro missam audire, capellanus noster aut oblationes quas prius habuit capellano capelle restituet, aut oblationes que tunc offerentur. Que omnia ut perpetuam stabilitatem obtineant, presentem paginam sigilli nostri auctoritate ac regii nominis karactere inferius annotato precepimus confirmari. Actum apud Fontemblaaudi anno incarnati Verbi millesimo ducentesimo septimo, regni nostri anno vicesimo nono, astantibus in palatio nostro quorum nomina supposita sunt et signa. Dapifero nullo. Signum Guidonis buticularii. Signum Mathei camerarii. Signum Droconis constabularii (Monogramme). Data vacante cancellaria, per manum fratris Garini.