1208, janvier. — Gisors.
Philippe Auguste confirme les conditions auxquelles l'abbé et le couvent de Saint-Ouen de Rouen avaient donné à Philippe, évêque de Beauvais, pour sa vie durant et moyennant mille livres parisis et une rente, ce qu'ils possédaient à Condé[-sur-Aisne] et à Sancy.
A. Original jadis scellé sur lacs de soie rouge et verte. Hauteur 188 mm. ; largeur 255 mm. Archives départementales de la Seine-Maritime, 14 H 754.
B. Extrait du xviiie s., Bibliothèque nationale, Collection Moreau, vol. 109, fol. 191, d'après A.
Indiqué : Du Monstier, Neustria pia, p. 130 ; L. Delisle, Cartulaire normand, p. 26, n° 157, d'après B.
Philippus Dei gratia Francorum rex. Noverint universi ad quos littere presentes pervenerint quod, inter dilectos nostros abbatem et conventum Sancti Audoeni Rothomagensis et dilectum consanguineum ac fidelem nostrum Philippum, Belvacensem episcopum, talis conventio intervenit quod videlicet idem Belvacensis episcopus, toto tempore vite sue, quicquid predicti abbas et conventus apud Conde et Sanci villas cum appenditiis suis habent, possidebit pacifice et quiete, tali tamen conditione adjecta quod trecentas libras parisiensium idem episcopus dictis monachis in presenti persolvit et in feria Latiniaci proximo ventura septingentas libras parisiensium eisdem solvet ; singulis autem annis usque ad decem annos, viginti libras parisiensium in octabis Omnium Sanctorum apud Belvacum eisdem persolvet ; ex tunc autem centum viginti libras parisiensium, medietatem in octabis Omnium Sanctorum et medietatem in octabis Pasche, singulis annis apud Belvacum eisdem monachis solvere tenebitur episcopus memoratus. Huic conventioni duxerunt annectendum quod, si episcopus in dictis territoriis aliqua titulo conquisierit emptionis vel in reparatione edificiorum sumptus fecerit et expensas, pro remedio anime sue, post obitum suum monasterio Sancti Audoeni Rothomagensis donat in perpetuum et concedit. Si vero eundem episcopum infra decem annos viam ingredi contigerit omnis carnis, quicquid perceperit de bonis dictarum villarum computabitur in sortem, bonorum estimatione virorum, et illud quod de sorte defecerit episcopus secundum beneplacitum suum cui et ubi voluerit dare poterit et legare. Eo autem casu contingente, unum monachum poterunt ad locum dicti monachi destinare, cui de bonis domus ipsius per custodem ab episcopo vel ab eo cui legaverit episcopus deputatum, erunt necessaria ministranda. Per talliam autem monachi, custos episcopi recipiet omnes redditus domus qui computabuntur in sortem, deductis expensis custodis, monachi et eorum familie competentis, donec predicte summe residuum fuerit persolutum. Et notandum quod in ecclesiis predictarum villarum dicti monachi jus sibi retinent patronatus. Nos autem, ad petitionem tam dicti episcopi quam predictorum abbatis et conventus, suprascriptam conventionem ratam habemus. Et ut firma ac stabilis in posterum perseveret, sigilli nostri auctoritate presentem paginam, salvo jure nostro, confirmamus. Actum Gisorcii, anno Domini M° CC° septimo, mense januario.