1209, du 29 mars au 31 octobre. — Paris.
Philippe Auguste vidime et confirme une charte accordée en 1208 à Saint-Victor de Paris par Guillaume du Fay, qui donnait à cette église, du consentement de son seigneur Girard de Vallangoujard, les dîmes du Fay et de Noisement.
A. Original jadis scellé sur lacs de soie verte et rouge. Hauteur, 316 mm. ; largeur, 225 mm. Archives nationales, K 27C, n° 28.
B. Copie du xiiie s., Cartulaire de l'abbaye de Saint-Victor, Archives nationales, Ll 1450, fol. 94 v°.
Indiqué : Tardif, Cartons des rois, p. 342, n° 754.
In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri quod nos cartam Guillelmi militis de Faiaco diligenter inspeximus in hec verba : Ego Guillelmus de Faiaco, notum facio omnibus presentes litteras inspecturis quod Robertus de Faiaco, avunculus meus, quintam partem decime de Faiaco et de Noisement, assensu et voluntate mea et Petronille sororis sue, ad quos predicta decima jure hereditario devenire debebat, pro sue et parentum suorum animarum salute dedit in perpetuam elemosinam ecclesie Sancti Victoris Parisiensis. Predicta vero ecclesia Sancti Victoris totum residuum predicte decime, ubicumque fuerit, sive in terris meis sive in aliis ruptis vel rumpendis, cum ipso feodo, et quicquid in eadem decima habebamus, cum granchia ante portam meam sita, auctoritate et voluntate capituli Rothomagensis, a me et Roberto avunculo meo, et Petronilla sorore sua, redemit pro trecentis libris parisiensium. Hoc concessit et voluit Maria uxor mea, et Henricus maritus Petronille amite mee, de cujus feodo pars predicte decime erat. Hoc etiam concesserunt Guillelmus miles de Baancort et Wernes et Johannes cognati mei et, fide interposita, plegii fuerunt juste garantisie portande, et dominus Galterus de Bahervilla plegius, fide interposita. Sciendum est autem quod in predicta decima redecimationem habent presbiteri de Amblenvilla, qui istam redemptionem voluerunt et laudaverunt et procuraverunt, et monachi de Laio unum sextarium bladi, et monachi de Valle Beate Marie de duabus culturis decimam quitam in elemosinam habent. De aliis vero terris quas colunt predicti monachi de Valle Beate Marie in eadem decimatione, decimam in integrum solvent. Dominus etiam Girardus de Valle Engueujart, de cujus feodo tota decima erat, assensu et voluntate predicti Henrici qui partem decime in feodum tenebat, istam redemptionem voluit et laudavit et quicquid in eadem decima habuit ecclesie Sancti Victoris quitavit, nichil sibi vel heredibus suis in posterum retinens. Insuper, de predictis omnibus fideliter observandis, fide interposita, plegium se constituit. Quod ne possit oblivione vel malignitate mutari, presentibus litteris sigillum meum apposui. Actum anno Verbi incarnati M° CC° octavo. Nos vero, quia supradicta decima de nobis principaliter movet, predicta, sicut superius continentur expressa, rata habemus, laudamus et approbamus. Et ut hoc perpetue stabilitatis robur obtineat, sigilli nostri auctoritate et regii nominis karactere inferius annotato presentem paginam confirmamus. Actum Parisius, anno Incarnationis dominice M° CC° nono, regni vero nostri anno tricesimo, astantibus in palatio nostro quorum nomina supposita sunt et signa. Dapifero nullo. Signum Guidonis buticularii. Signum Bartholomei de Roia camerarii. Signum Droconis constabularii.
Data vacante (Monogramme) cancellaria, per manum fratris Garini.