1209, du 1er novembre, au 17 avril 1210. — Corbie.

In nomine sancte et individue Trinitatis. Amen. Ph[ilippus] Dei gratia Francorum rex. Noverint universi presentes pariter et futuri quod, cum Johannes abbas totusque conventus Corbeie adversus Antelmum militem de Garegnies, fidelem nostrum, quondam majorem de Naors, causas multiplices et graves haberent, tamdem (sic), de consensu et consilio prudentum et nobilium virorum, in hac pacis concordia devenerunt : ipse siquidem Antelmus omni rei quam habebat vel habere dinoscebatur apud Naors vel ejus appendenciis omnino, in presencia multorum tam monachorum quam aliorum, abrenunciavit in publico et juravit, tactis sacrosanctis reliquiis, quod nec ipse nec aliquis ex heredibus ejus vel ex parte eorum, aliquid in prefata villa vel ejus appendiciis de cetero reclamabunt. Unde predicti monachi, de benignitate sua erga ipsum Antelmum diligencius agentes, providerunt ei triginta libras de theloneo suo Corbeie singulis annis, feria quinta post festum sancti Remigii, de septimana in septimanam per sexagenos solidos usquequo triginta librarum solutionem fuerit assecutus, capiendas, cum quindecim modiis frumenti et avene per medium, distinctis de grangia Septinville, per manum abbatis Sancti Johannis Anbianensis (sic) eidem Antelmo vel heredi suo singulis annis in festo sancti Remigii persolvendos, eodem modo solutionis observato, penes ipsum vel heredes suos, quem predictus abbas et ecclesia sua penes monachos Corbie hactenus observarunt. Ad hujus igitur rei firmitatem, predictus Antelmus se ipsum penes monachos adeo obligavit quod prefatas triginta libras cum annona alicui vendere vel obligare non potest, nec ejus heres, quia predicte triginta libre cum annona pro obside pacis penes monachos Corbie remanent obligate, de quibus omnibus predictis tam ipse Antelmus quam heredes sui ligium homagium ecclesie Corbiensi tenentur exibere. Adjectum est autem quod si prefatus Antelmus vel ejus heres aut aliquis ex parte eorum pacem istam aliquo tempore ducerent infirmandam, predicte triginta libre cum annona usque ad condignam satisfactionem in manu monachorum Corbie reverterentur, et omnia feoda quecumque tenet a nobis et aliis dominis suis, tam ad nos quam ad alios dominos suos de quibus predicta tenet feoda reverterentur, qui ea in manu sua sine relaxatione tenerent, sicut et nos nostra, quousque plenam et condignam satisfactionem de suis injuriis ipse vel ejus heredes dictis monachis Corbie exiberent. Si vero prefate triginta libre cum annona prefatis terminis non essent persolute, idem Antelmus vel ejus heredes, post quintum decimum diem sue ammonicionis, de rebus monachorum Corbie licite capere possent, excepto apud Naors et ejus appendicia, absque forisfacto, donec sui defectus eidem vel ejus heredibus supplerentur. Preterea, de communi assensu capituli Corbie et dicti Antelmi, statutum est quod cyrographum conventionis istius in ecclesia Beati Johannis Anbianensis reponeretur, ad quod, si quando inter eos scrupulus discordie oriretur, fieret recursus testimonii, de quo monachi sine Antelmo vel ejus herede, nec Antelmus vel ejus heres sine monachis, copiam possent habere. Quod ut perpetuum robur obtineat, sigilli nostri auctoritate et regii nominis karactere inferius annotato, ad preces et petitionem dicti Antelmi et monachorum Corbie, huic conventioni testimonium perhibemus. Actum Corbie, anno ab Incarnatione Domini millesimo ducentesimo nono, regni vero nostri anno tricesimo primo, astantibus in palacio nostro quorum nomina supposita sunt et signa. Dapifero nullo. Signum Guidonis buticularii. Signum Bartholomei camerarii. Signum Droconis constabularii. Data vacante (Monogramme) ca[n]cellaria.