1209, du 1er novembre, au 17 avril 1210. — Paris.
Philippe Auguste confirme la décision de l'abbé de Saint-Remi de Reims, taxant à douze deniers par feu les habitants du bourg de Saint-Remi, pour subvenir aux frais du gîte qu'il doit au roi, une fois par an.
A. Original perdu.
B. Copie du xive s., Cartulaire C de Saint-Remi de Reims, Archives départementales de la Marne, 56 H 1030, fol. 11.
In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri quod, cum mansionarii de burgo Sancti Remigii Remensis et de villis eidem appendentibus, occasione talliarum quas abbas et monachi Sancti Remigii ibi faciebant, a dominio eorumdem monachorum se substraherent, pio et salubri usi consilio, predicti abbas et monachi eisdem mansionariis quamdam concesserunt assisiam que talis est scilicet quod unusquisque focus, singulis annis in festo sancti Remigii in vindemiis, abbati et monachis duodecim denarios persolvet, verumptamen pro nostra procuratione que semel in anno a dictis monachis nobis debetur si Remis venerimus, unusquisque focus tantum eisdem monachis reddet die tercia postquam de nostra procuratione nobis satisfecerint, quantum de assisia supradicta eisdem monachis reddere tenetur, et ipsi monachi servicium nostrum reddent et servicium archiepiscopi Remensis. Si vero monasterium Sancti Remigii servicium nostrum et servicium archiepiscopi Remensis solvere non potuerit, tam nos quam archiepiscopus, pro servicio quod nobis debetur, ad burgum et ad villas que sunt de assisia recursum sine contradictione habebimus. Sciendum est autem quod nullus infra bannum dictorum monachorum manens liber erit ab assisia supradicta. Quod ut perpetuum robur obtineat, salvo jure nostro et heredum nostrorum et archiepiscopi Remensis, sigilli nostri auctoritate et regii nominis karactere inferius annotato confirmamus. Actum Parisius, anno ab Incarnatione Domini M° CC° nono, regni vero nostri anno tricesimo primo, astantibus in palacio nostro quorum nomina supposita sunt et signa. Dapifero nullo. Signum Guidonis buticularii. Signum Bartholomei camerarii. Signum Droconis constabularii. Data vacante cancellaria.