1185, du 21 avril au 31 octobre. — Paris.
Philippe Auguste confirme les droits que Gui, évêque de Châlons, avait reconnus à l'abbé et aux chanoines de l'église de Toussaints-en-l'Île.
A. Original scellé, sur lacs de soie rouge et verte, d'un sceau disparu. Hauteur, 381 mm. à gauche, 388 mm. à droite; largeur, 352 mm. en haut, 370 mm. en bas. Archives départementales de la Marne, H 213.
B. Original sans repli de parchemin, ni trace de scellement et n'ayant peut-être jamais été scellé. Hauteur, 300 mm. ; largeur, 330 mm. Archives départementales de la Marne, H 213.
C. Copie du xiiie siècle, Cartulaire de Toussaints-en-l'Île, fol. 4, Archives départementales de la Marne, H 206.
In nomine sancte et individue Trinitatis. Amen. Philippus Dei gratia Francorum rex. Que bono zelo geruntur litterarum memorie decet commendari, ne a posteris quos ad mala proniores fore timemus aliquatenus perperam valeant retractari. Noverint igitur universi presentes pariter et futuri quoniam fidelis noster Rogerus, abbas ecclesie Omnium Sanctorum de Insula Cathalaunensi, et canonici inibi sub regula beati Augustini Deo servientes, a fideli nostro Guidone, episcopo Cathalaunensi, supplicationibus maximis impetrarunt quatinus libertatem et jura ecclesie sue illibata servaret. Ipse autem, inspectis privilegiis et confirmationibus Romanorum pontificum et felicis memorie patris nostri Ludovici, regis Francorum, et Gaufridi, episcopi Cathalaunensis et Rogeri secundi qui eandem ecclesiam a fundamentis erexit et totam insulam eidem ecclesie adjacentem precio a possessoribus redemptam totam liberam sepefate ecclesie titulo elemosine contulit, juste peticioni eorum benignum prebens assensum, et de sua liberalitate bona illius ecclesie ampliare volens, divine pietatis intuitu, concessit per totam insulam domos ad habitandum de novo construi et pontem per quem libere de insula transeatur in civitatem. Illis autem qui super ripas domos edificabunt concessit duos cubitos in aqua, si necesse fuerit, stipites infigere, ad sustentandum trabes et laquearia domorum vel ad alios usus sibi necessarios. Hoc tamen excepit quod homines episcopi et homines ecclesie Beati Stephani qui habent proprias domos in civitate non habebunt potestatem transmeandi et habitandi in ipsa insula. Prefatam vero insulam et bannum et habitatores ejus, sicut prelibatum est, liberrimos esse censuit et ab omni consuetudine, tallia et questu et querela, que pro diversis occasionibus in civitate solent evenire frequenter, emancipavit. Nos autem, ad peticionem predicti Rogeri abbatis et fratrum in prefata ecclesia commorantium, intuitu Dei et ob remedium anime nostre et patris nostri pie recordationis regis Ludovici et predecessorum nostrorum, dicte elemosine supremam manum apponentes, eam salvo jure alieno benigne concedimus et in perpetuum stabilem esse precipimus. Que omnia ut in posterum rata et illibata permaneant, presentem paginam sigilli nostri auctoritate ac regii nominis karactere inferius annotato fecimus confirmari. Actum Parisius, anno ab incarnatione Domini M°.C°.LXXX°.V°., regni nostri anno VIto, astantibus in palatio nostro quorum nomina supposita sunt et signa. Signum comitis Theobaudi, dapiferi nostri. Signum Guidonis buticularii. Signum Mathei camerarii. Signum Radulfi constabularii.
Data per manum (Monogramme) Hugonis cancellarii.