1217, du 26 mars au 31 octobre. — Paris.

Dominus rex confirmavit cartam de Miraumont, salvo jure suo et alieno, et salvo eo quod si homines de Miromonte aliquem de hominibus suis reciperent, quam cito ex parte regis requireretur, ipsi hominem requisitum ex tunc non retinerent, eumque cum rebus suis reddendo, exinde quieti remanerent. Actum Parisius, anno Domini M° CC° XVII°, regni vero nostri XXX° VIII°.

Jou Philipel rois de Fransche par la grasce de Diu. Sachent toust que nous avons veue le carte Huon de Miraumont no amy en tel paroles :

Jou Hues sires de Miraumont fais scavoir a tous cheaus quy ches lestre veront que les convenanches et les coustumes dues entre Guion men pere et men devencier et seigneur de Miraumont jadis, et les houmes de cel meisme castel ayiet otroie ferme, sy comme il est du contenu en l'autentilque men pere fait de ces convenanche en sen tans en tel maniere parole a parole :

Pierre, vesque d'Airas par la grasce de Diu, a tous boins chrestiene salut en Nostre Seigneur. Sachent toust que Guy ly sires de Miraumont et Hubert ly prestre et trois eschevins del caltel devant dit, Robert, Gillos et Oves, nous aparterrent une carte contenant convenanche entre le devant dit Guion et les hommes de Miraumont dont le contenanche est tel :

Ly hommes de Miraumont cascum est tenu de rendre a sen seigneur cascun an pour sen mes deu sous de Paris a la Saint Remy, et un meneaul d'avoine a la Tousain. Et ly sires a juré par sen sairement estraint que pour necessité que il ait ne pour disette nule qu'il ne sera el devant dit castel taille ne cueilliette ny austre esforcement d'ors en avant ne austre cose par force ne par violence, ne il [ne] ses hoirs n'y prendra.

— Il losit cascun houme de Miraumont sen mes et toust ses possessions quel que il l'ait, soit el castel, soit dehors les castel el teroire de Miraumont vendre a quiconque il vaura et austre acater, en tel manieres que ly vendant paiera au seigneur, par devant esquevins, quatre deniers d'issu, et ly acatant six deniers d'entree et se ly sire ne les vouloir rechevoir, sy seroit ferme et estable tou chou quy est faict del acat et del vendage par devant eschevins.

— Quand le houme deffunt, ses hoirs entre en sen mes et en toust les possessions par six deniers de relief, et s'il n'estoint paiez devant esquevins dedans set jours, il seroit rendu par loy ; et sy ly sire ne le vouloiet recevoir, ly oirs entiera en ses mes et en toust les possessions et le tienra quittement et en pais.

— Li sart del teroir de Puisieurs doivent estre trestiez par jugement de sartiers de Puisieurs. Toust austre coses apartenant a fourfait seront traities par raison et par jugement d'esquevins.

Ceste convenanche et cette franquise del devant dit castel, sy comme il est escrit, proumisent a tenir par maulement, par foir et par sairement Anne Aiglielain et sy fil Robert, Huel, Anliaulme, Bauduins Englierant et quy est ly frere medame Aighelaine, Guis et Raoul et meimesment li quens de Saint Paul, Hues et Engherant ses frere.

Et est a scavoir qu'il est estauly et toust les devant Guion pour plus grand franquise del castel le devant dit Guion refaire tout les fours del castel devant dit a ses propre cous en toust manieres s'il sont despechez qu'il ne conviene par aucune ocasions les houmes manans el castel aller outre four et sy le devant Guis ne le vouloiet refaire, il pourront fournier sans fourfait et sans rente au seigneur.

Et c'est a scavoir que ly houmes d'Irle [et] de Miraumont soit d'une meisme coutumes en toust coses, en consel, en aîné et parchonnier sur leurs sairement, en cours et en despens, sy mestier est.

— Ly oirs et quiconque tienra le seigneur del castel sera tenu de vuarder sans entreprendre cet coutume devant escritte sur sen et sur le sairement de ses seigneur et de ses amis et par plaige alquel ly plus saine partie del houme del castel s'assentira au chois qu'il soit receu del houmes.

Toust austre cose quy avenront el castel doivent estre traittie par loy et jugement d'esquevins. De cest coustume est tesmoin et pleige ly quens Phelipel de Flandre.

Lequel coutume le ly sire de Miraumont ne le veut tenir, il n'y et duus el castel pour sire ne ny sera tenue pour cretiens.

Sy est a scavoir que le houme del castel sur le sairement qu'il ont fait entre aus par l'assen le seigneur deffendront le devant dit coutume devers leur seigneur sans fourfait.

Ceste coutume jura Guy ly sire de Miraumont a tenir fermement et Margheritte le femme et Miquieul connestable de Flandre, Bauduins ly catellin d'Aras, dame Aelis de Grandcourt, Auliaul et Guy ly fil Nicol d'Assiel et ly austre quy tient fief el castel et Nicole del Baisseul et ly frere Guiffray de Hamelaincourt, Nicholes de Mailly, Simon Dupie, Drinette d'Amiens.

Ceste convenance nous offrient et proumient fermement a tenir ly devant dit Guys sires de Miraumont et ly troy devant nomée esquevins pour aus et pour les austre, laquel cose soit ferme et estable nous l'avons confermé par l'inpossitions de no sel et y mettons de chiaus quy furent present les nons quand cet carte nous fut offert : Jehans archidiacre d'Aras, Raoul archidiacre, Ernoul abbé de Le Vicoigne, Hubert abbé de Cambray, Ogiers et Rembert camione, Robert de Douay, Nauters Maradnis et austre plusieurs.

L'an de l'Incarnations mil cent quatre vingt sept a tous Pierron vesque d'Aras, Phelippon, conte de Flandre, jou sy come jadit pardevant ay ferme estaules ches coustume et ches convenanche devant afficques et veuel et otroy que touste cose quy avenront el castel et en toust le teroir de Miraumont aussy de terres que d'austre querelles soit traiste par loy et jugement d'esquevins, tout ches chose devant dit et ferme et estaules a tenir en bonne fois par le serment de men cors et chou meisme jurement a tenir a noble home my seigneur et my amy de leurs pas et ame resquette.

S'il est a scavoir li quens de Pontieu Vuilliaume, sire Miquieul de Harnes mes oncles, Jahans chatellain de Lens, Bauduin de Biauvoir, liquel en liverons as hommes de Miraumont leurs lestre pendant et chou mesme jurement Vuistassel Bauduins et Hues frere le devant dit castellain de Lens, Helluines de Vuavring mes oncle, Hues castellain d'Aras, Huars de Hamelincourt, Ifrugeins de Montieruel chevalier, Hellines freres de Vuavring chevechaus de Flandre, Miquieul de Boules connestable de Flandre, Bauduins siul le castellin de Lens et Miquieul mes frere et entre les austre li fiefvée de Miraumont, Guy de Grancourt, Bernard de Gesmiescourt, Vuarnal d'Eissiet et toust ly austre fiefvée del castel affermerent tou chou devise sur par leur serment et envesque tout a la plus grande seuretté de la vil ay promis fermement a tenir ches convenanche devant monseigneur l'evesque d'Aras Raoul sur le perille de ma crestientee.

Et pour chou que che convenanche et franquise devant dits soint ferme et estaullé a toujours et sans entreprendre, jou fes faire cette present carte et l'imforchay par l'appention de men sel. Che fut fait l'an de l'Incarnations mil deux cent et douze en l'uitiesme de mars.

Nous, a la resquette ly devant dit Huon, les convenanche et les coustume devant escriste voulon que eles soit fermes, et pour chou que les aient frere parmanaullement a toujours nous avons confirmé cette present carte de nos seel et enseigné de nos enseigne roial sauf nos droit et les drois d'austray, conformons che cose devisée, et sauf chou que [sy] ly houme de Miraumont avoient rechu aucun de nos houme, sitot qu'il seroit resquis de nos partie, qu'il ne retenisent mie no houme quy resquis aroit esté ains le rendisent a toust che cose et partant en demeureait et pais.

Che fut fait a Paris l'an de l'Incarnations mil deux cent dix sept en l'an de nostre regne trent huit ans et s'y furent en nostre palais de quy ly nons sont chy mis en escrit et leurs signe. Ly panestiers, ly singnes Guion le bouttelliers, le singne Bretermiu le cambrelant, ly seigne Drievon le connestable.