1217, du 6 juin au 31 octobre. — Melun.
Philippe Auguste confirme la charte par laquelle Baudouin, seigneur de Beaurevoir, abandonne toute revendication sur les bois de l'abbaye du Mont-Saint-Martin.
A. Original perdu.
B. Copie du xiiie s., Cartulaire du Mont-Saint-Martin, Bibliothèque nationale, ms. lat. 5478, fol. 10.
C. Copie abrégée du xviie s., Bibliothèque nationale, ms. nouv. acq. fr. 7385, fol. 280, d'après B ou sa copie.
D. Copie du commencement du xviiie s., Archives de l'Aisne, H 1116, fol. 15 v°.
E. Copie de 1740, Bibliothèque nationale, ms. lat. 9128, fol. 2 v°, d'après un registre en parchemin couvert en veau, de 293 fol., copie collationnée de B.
Indiqué : C.L. Hugo, Sacri et canonici ordinis praemonstratensis annales, t. II, col. 325 (attribué à Philippe V Le Long) ; L.P. Colliette, Mémoires pour servir à l'histoire de Vermandois, t. II, p. 94.
In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri nos cartam dilecti et fidelis nostri Baldoini de Bello Videre inspexisse sub hac forma :
In nomine sancte et individue Trinitatis. Ego Balduinus, dominus de Bello Videre, notum facio presentibus et futuris quod cum adversus ecclesiam Montis Sancti Martini super nemoribus de Roselfait, de Gisencort et de Curtisellis pro me et heredibus meis necnon et hominibus meis querelam movissem et eadem querela ad dominum regem delata fuisset, tam me quam abbate et fratribus predicte ecclesie coram ipso domino rege certa die presentibus, ita fuit auctoritate regia ordinatum ut eadem querela in ipsius curia coram ballivis suis in assisiis tractaretur. Cum igitur de mandato domini regis michi et prefate ecclesie coram ipsius ballivis dies fuisset apud Calniacum assignata, presentibus ibidem partibus, ego, saniori usus consilio, mediantibus tam ipsis ballivis quam aliis probis viris, quitavi totam querelam quam contra dictam ecclesiam moveram super nemoribus memoratis. Preterea, ne aliqua in posterum possit inter me et ipsam ecclesiam litis occasio suboriri, si quid juris vel consuetudinis habebam tam in predictis nemoribus quam in aliis nominate ecclesie possessionibus, videlicet nemoribus de Ballio ante abbatiam, de Everaucurt, de Forestel, de Villari, de Hangicurt, de Fontana, ipsaque abbatia, curtibus et villis suis cum universis earum tenementis vel pertinentiis, nemoribus, terris, terragiis, decimis, aquis, pratis, pascuis, molendinis ac rebus aliis que tempore confectionis hujus scripti dicta ecclesia possidebat, resignavi penitus et quitavi. Et tam ego quam frater meus Adam miles corporaliter fidem dedimus in manu ballivorum nos ea omnia que predicta sunt firmiter in perpetuum servaturos. Nichilominus etiam Osylia uxor mea, Maria soror mea, simulque liberi mei Matheus, Jacobus et ceteri, necnon et omnes homines mei predicte querele participes, id quod a me factum est approbantes, tam fide prestita quam juramento interposito, promiserunt super omnibus que predicta sunt nec per se nec per alios a modo in perpetuum adversus nominatam ecclesiam suscitaturos querelam vel molestiam quamlibet illaturos. Ad majorem autem securitatem, coram illustri rege Francorum Philippo predicta omnia recognovi et rogavi eum ut ea scripto suo et regio karactere communiret. Ut igitur hec omnia que hic comprehensa sunt perpetuam obtineant firmitatem, presens scriptum emisi sigilli mei munimine roboratum. Actum Calniaci, anno gratie M° CC° XVII°, octavo idus junii.
Nos igitur que premissa sunt attestantes, ut eadem perpetue stabilitatis robur obtineant, presentem cartam sigilli nostri auctoritate et regii nominis karactere inferius annotato ad petitionem dicti Balduini confirmamus. Actum Meledunum (sic), anno dominice Incarnationis M° CC° XVII°, regni vero nostri tricesimo octavo, astantibus in palatio nostro quorum nomina supposita sunt et signa. Dapifero nullo. Signum Guidonis buticularii. Signum Bartholomei camerarii. Signum Drogonis constabularii. Data vacante (Monogramme) cancellaria.