1218, juillet. — Compiègne.
Philippe Auguste confirme une charte de Goubert, seigneur de Clacy et vidame du Laonnois, datée de juin 1218, par laquelle ce dernier abandonne à Anselme, évêque de Laon, sa vie durant, ce qu'il avait dans la vidamie du Laonnois ainsi qu'à Anizy-le-Château, à Pouilly, à Septvaux et à Versigny.
A. Original perdu.
B. Copie du xiiie s., Petit cartulaire de l'évêché de Laon, Archives de l'Aisne, G 1, fol. 7 v°, n° 11.
C. Copie du xive s., Grand cartulaire de l'évêché de Laon, Archives de l'Aisne, G 2, fol. 24, n° 36.
D. Copie par dom Grenier, Bibliothèque nationale, Collection Moreau, vol. 123, fol. 186, d'après B.
Texte établi d'après BC.
Philippus Dei gratia Francorum rex. Noverint universi presentes pariter et futuri nos inspexisse litteras Goberti, vicedomini de Laudunesio, sub hac forma :
Ego Gobertus, dominus de Claci et vicedominus Laudunensis, notum facio omnibus presentes litteras inspecturis quod ego feci conventionem cum venerabili patre ac domino meo Ancelmo, Dei gratia episcopo Laudunensi, super omnibus que habeo in vicedominatu Laudunesii sive sit extraheria sive tallia sive quodcumque aliud in Laudunesio ex casu vel alio modo eveniens a prefato episcopo integre habendis et tenendis pro viginti quinque libris parisiensium mihi reddendis singulis annis in domo ipsius episcopi apud Laudunum in nativitate Domini quamdiu vixerit idem episcopus et episcopatum Laudunensem reget, retentis mihi tantum liberis servientibus meis et preposito qui communis est mihi et episcopo et custodia prisonum et redditibus meis et parte que me contingit in justiciis de viginti duobus solidis et dimidio bone monete. Sciendum tamen est quod prisonarios debeo custodire per quatuor liberos servientes vicedominatus intra vicedominatum Laudunesii nec eos possum extra ducere. Item sciendum quod dominus episcopus omnia forisfacta penitus potest remittere et quitare antequam ad jus sit appodiatum ; postquam autem ad jus fuerit appodiatum et etiam ante si inde capiat aliquid episcopus, habeo partem meam in viginti duobus solidis et dimidio, sicut dictum est, et non amplius licet emenda excedat viginti duos solidos et dimidium bone monete. Item conventionem quam fecerat mater mea Matildis ad vitam suam cum eodem episcopo pro sexies viginti libris et centum solidis parisiensium sibi annuatim reddendis quamdiu idem episcopus episcopatum reget, que conventio continetur in litteris sigilli domini Alardi de Cymaio et Matildis matris mee sigillatis, quas episcopus habet penes se, post decessum ipsius matris mee per dictam conventionem quam cum eodem episcopo feci teneor ego et heredes mei post me ipsi episcopo quamdiu episcopatum reget Laudunensem firmiter observare. Item postmodum post omnes dictas conventiones ego vendidi eidem episcopo absolute et generaliter quicquid habeo vel habere possum apud Anisi et Poeilli et dominatus eorum et apud Sesvaux et Vercegni et potestates eorum ratione vicedominatus vel alio quoquo modo, tam custodiam prisonum quam omnes redditus et justicias et omnia prorsus alia que habebam et habere poteram in quatuor dictis villis pro ducentis libris pruviniensibus ad vitam suam habenda integre et tenenda, nichil mihi vel meis heredibus retinendo. Hec autem omnia laudaverunt Radulphus clericus et Girardus laicus fratres mei, Petronilla de Montmort et Sarracena de Hostel sorores mee et Maria uxor mea, et juramento corporaliter prestito firmaverunt quod super hiis omnibus nunquam de cetero reclamabunt. Guido etiam de Montmort, maritus dicte Petronille sororis mee, illud idem per suas patentes litteras approbavit. Predicta autem omnia facta sunt salvo in omnibus jure episcopi sepedicti et successorum ipsius et salvo servicio a me et heredibus meis debito episcopo Laudunensi. In cujus rei memoriam et testimonium predicto episcopo tradidi presentes litteras sigilli mei munimine roboratas. Actum anno Domini M° CC° octavo decimo, mense junio.
Cum autem vicedominus predictus et fratres et sorores ejus, [et] Maria uxor dicti vicedomini, conventionem istam sicut prenotata est spontanea voluntate coram nobis laudaverint, nos in hujus rei memoriam et testimonium, ad petitionem vicedomini et fratrum et sororum et dicte uxoris sue, presentem cartam fecimus sigillo nostro sigillari, ita quod si contingeret quod vicedominus vel fratres vel sorores sue sive uxor vicedomini dicte contrairent conventioni, nos assignaremus ad quicquid dictus vicedominus teneret de nobis, et tam diu illud in manu nostra teneremus quousque id esset plenius emendatum. Actum apud Compendium, anno Domini M° CC° octavo decimo, mense julio.