1220, d'avril au 31 octobre. — Melun.

In nomine sancte et individue Trinitatis. Amen. Philippus Dei gracia Francorum rex. Noverint universi presentes pariter et futuri nos audivisse litteras majoris, juratorum et communie Sancti Quintini sub hac forma :

Majores, jurati et communia Sancti Quintini omnibus ad quos presentes littere pervenerint in Domino salutem. Universitati vestre notum facimus quod nos, pro quatuor illis furnis quos decanus et capitulum Sancti Quintini habebant apud Sanctum Quintinum, scilicet furno de Capella Rotonda, furno de Sancta Pecinna, qui est in Botefour, furno de Hastis, qui est in Griancia, et furno de ante domum Roberti de Nova Villeta, quos omnes quatuor [furnos] dicti decanus et capitulum nobis in perpetuum quittaverunt cum universis libertatibus et proventibus, fundis terrarum et edificiis eorumdem furnorum, dedimus eis et concessimus septuaginta et quinque libras parisiensium annui redditus, annuatim reddendas hiis duobus terminis, scilicet medietatem ad Natale Domini, et aliam medietatem ad sequens festum Nativitatis sancti Johannis Baptiste. Decanus autem et capitulum, furnum suum de Trauberlain, ante domum Templi, sibi retinuerunt in perpetuum cum hiis libertatibus, scilicet duo portitores panis et piste deferendorum ad furnum, et furnarius, qui in suis propriis personis officia exercuerint, immunes erunt et liberi ab omnibus oneribus, misiis et exactionibus communie Sancti Quintini. Communia autem Sancti Quintini, vel aliquis de communia, non potest aliquem vel aliquos prohibere vel impedire quin veniant ad dictum furnum ecclesie et capituli Sancti Quintini ad coquendum panem. Quod si aliqua occasione suspecti haberemus, nos majores et communia decano et canonicis de impedimento vel inhibitione facta quominus ad dictum furnum venirent ad coquendum, major sive majores, si plures essent ibi, simul ad citationem capituli tenerentur venire, infra quindecim dies, juraturi pro se et communia, bona fide, quod nullum impedimentum vel inhibitionem fecit, vel faciet, vel fieri permittet, et super hoc unico juramento contenti erunt. Decanus et capitulum quolibet anno, et propter hanc suspicionem ultra juramentum istud, a majore vel communia nichil poterunt amplius exigere vel in causam trahere. Decanus etiam vel capitulum non possunt ultra novum furnum construere neque burgenses similiter. Et si forte contigerit dictam communiam deficere, dictos quatuor furnos cum appenditiis suis... melioracione edificiorum si qua fuerit. Si vero dictam communiam infra quinquennium subsequens rehaberi contigerit, communia tenebitur... eosdem furnos tenebitur reddere communie memorate, hoc salvo quod si ecclesia infra illud quinquennium aliquas expensas faceret... bona fide... hominum... causa furnorum illorum detinendorum in statu pristino, illas expensas tenetur communia ecclesie resarcire. Utrique eciam parti furnum suum vel... furnorum debent alicui alii a capitulo redditum, burgenses redditum illum reddent. Si vero debent capitulo, nichil inde reddent burgenses. Sciendum est... medietatem scilicet in crastino Natalis Domini et aliam medietatem in crastino Nativitatis sancti Johannis Baptiste, nec redderet senescallo capituli vel ebdomadario... senescallus... contra voluntatem capituli solvere differret, eidem capitulo quinque solidos pro pena reddere teneretur. In cujus rei testimonium et perpetuam firmitatem fecimus presentem paginam sigilli nostri muniri. Datum anno gratie M° CC° vicesimo, mense aprili.

Nos autem ut conventiones iste perpetue firmitatis robur obtineant, ad peticionem majoris et juratorum communie Sancti Quintini... ex altera, presentem cartam sigilli nostri auctoritate et regii nominis karactere inferius annotato, salvo jure nostro, confirmamus. Actum apud Meledunum, anno Domini millesimo ducentesimo vicesimo, [regni vero nostri] quadragesimo primo, astantibus in palacio nostro quorum nomina supposita sunt et signa. Dapifero nullo. Signum Guidonis buticularii. Signum Bartolomei camerarii. Signum Mathei constabularii.

Data vacante (Monogramme) cancellaria.