1222, du 3 avril au 31 octobre. — Melun.
Philippe Auguste confirme l'accord conclu entre le chapitre de Saint-Quentin et Renaud de Sinceny, chevalier, au sujet des bois de Sinceny.
A. Original perdu.
B. Copie du xiiie s., Registre E de Philippe Auguste, fol. 144.
In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri quod contencio que vertebatur inter capitulum Sancti Quintini ex una parte et Renaldum de Cincegni militem ex altera sopita est in hunc modum : Capitulum nullum jus clamat in parvo forestello quod est inter domum leprosorum et Cincegni ; de omnibus aliis boscis de Cincegni et qui pertinent ad Cincegni, recognovit Renaldus quod capitulum debet habere duas partes tam in nemoribus quam in fundo nemorum cum omni justicia et jure imperpetuum, et capitulum consensit quod Renaldus et sui successores habeant terciam partem tam in nemoribus quam in fundo cum omni justicia et jure, ita quod Renaldus nichil juris retinuit in duabus partibus capituli nec capitulum aliquod jus retinuit in tercia parte Renaldi. De magno forestello similiter est statutum. Una pars tercie nemorum que pertinet ad Renaldum est in fine magnorum nemorum de Cincegni versus altam viam ; alia vero pars ejusdem tercie est in longitudine magni forestelli versus stratam Calniaci et Suessionis ; totum residuum nemorum predictorum cum duabus brociis, scilicet Le Concis et La Pomeroie, in duabus partibus ecclesie continentur. Due autem partes ecclesie distincte sunt a tercia parte Renaldi per metas. Hanc autem composicionem juravit super sacrosancta Renaldus predictus coram nobis se bona fide servaturum. Ut igitur ipsa composicio perpetue stabilitatis robur obtineat, presentem paginam sigilli nostri auctoritate et regii nominis karactere inferius annotato ad peticionem partium salvo jure nostro confirmamus. Actum Meleduni, anno dominice Incarnationis M° CC° vicesimo secundo, regni vero nostri quadragesimo tercio, astantibus in palacio nostro quorum nomina supposita sunt et signa. Dapifero nullo. Buticulario nullo. Signum Bartholomei camerarii. Signum Mathei constabularii. Data vacante cancellaria.