1222, du 23 au 31 octobre. — Melun.

Philippus Dei gratia Francorum rex. Noverint universi presentes pariter et futuri nos vidisse litteras dilecte et fidelis nostre Isabellis de Castellione sub hac forma :

Isabellis de Castellione, comitissa Sancti Pauli, universis presentes litteras inspecturis salutem. Noveritis inter me ex una parte et Guidonem filium meum ex altera talem conventionem per dictum domini Roberti de Bova in domini regis presentia factum esse : Dictus Guido filius meus creantavit et concessit burgensibus mercatum quod eis feceram de duobus milibus mencoldis bladi et duobus milibus et septingentis libratis nemoris, nisi forte sibi voluerit retinere mercatum illud eo modo quo dicti burgenses habent illud. Ita quod ego exinde nullum dampnum incurram. Et filius meus Guido debet persolvere tria milia et ducentas libras parisiensium pro debito meo ad terminos presentes et qui postmodum venient, de quibus denariis debet ultima pars persolvi infra primam dominicam quadragesime instantis. Et si forte contingeret quod pecunia ista non solveretur terminis assignatis solutioni dicti debiti et propter defectum pagamenti costum aliquem facerem, ipse Guido tenebitur reddere coustum illum ex quo hee conventiones sunt coram domino rege creantate. Sciendum autem quod Guido prefatus debet habere medietatem forisfactorum et emendarum comitatus de Ternoys ab hoc instanti festo Omnium Sanctorum usque ad octo annos continuos. Et si ego possem persolvere mille libras infra Purificationem Beate Marie, forisfacta mea et emende mee mihi remanerent ; et si dictas mille libras non possum persolvere, Guido filius meus potest habere ballivum suum in dicto comitatu, et ego meum, et meus et ipsius ballivi debent nobis mutuo per juramentum obligari quod ipsi mihi et dicto filio meo jura nostra fideliter observabunt et ea nobis reddent ; et si ita non facerent et ego inde essem conquerens, debet hoc emendari per dictum domini Roberti de Bova. Preterea Guido debet habere dotalicium meum, scilicet Brougni et Troissi cum pertinenciis per spacium octo annorum predictorum, et ipse debet michi dare ducentas libras pruvinensium, et debeo habere omnes bestias que sunt in dotalicio meo. Et si forte contingeret quod domina et mater mea comitissa de Incra infra dictorum annorum octo terminum moreretur, dotalicium meum, scilicet Brougni et Troissi, meis filiis remaneret sicut ante hujus confectionem carte inter me et filios meos prius fuerat concessum. Et Guido filius meus Incram et dotalicium quantumcumque predicta mater mea tenet debet habere per totum id temporis quod supererit de octo annis predictis. Et si conti[n]gerit quod dictus Guido filius meus homines meos non ducat per jus aut legem et ego de hoc fuero conquerens, debet emendari per dictum domini Roberti de Bova tam in comitatu quam in dotalicio si forte exciderit. Sciendum vero est quod per conventiones istas non possum facere aliquid debitum ab instanti Pascha in duos annos, nec etiam ex tunc possum facere debitum quod excedat summam mille librarum ; et si hoc forte facerem, dictus filius meus non teneretur ipsum debitum reddere. Nec posset aliquis propter debitum quod amodo facerem aliquem de hominibus terre mee capere, set de debitis factis usque ad hanc diem que est dominica proxima ante festum apostolorum Simonis et Jude, teneor ego ad reddendum. Si autem contingeret quod submonita essem de servitio domini regis aut domini Ludovici primogeniti sui, possem libere mutuare per testimonium hominum meorum quantum necesse esset ad servicium domini regis aut domini Ludovici. Si vero dominus Robertus de Bova moreretur aut iret in peregrinationem, convenciones iste emendari debent per dictum domini qui nunc est Morinensis episcopi ; et si de illo contingeret quod moreretur vel iret in peregrinationem, dicte conventiones emendari debent per dictum domini Belvacensis episcopi qui nunc est ; et de hiis conventionibus tenendis et firmiter observandis, debemus ego et dominus Robertus de Bova habere litteras dicti filii mei Guidonis patentes. Et dominus rex et dominus Ludovicus ad peticionem et preces meas conventiones prenotatas per suas litteras confirmarunt. Actum anno Domini M° CC° vicesimo secundo, mense octobri, dominica proxima ante festum apostolorum Simonis et Jude.

Nos igitur ad peticionem parcium in memoriam et testimonium conventionum prescriptarum sigilli nostri auctoritate presentem paginam salvo jure et servitio nostro fecimus communiri. Actum Meleduni, anno Domini millesimo ducentesimo vicesimo secundo, mense octobri.