1223, du 1er février au 22 avril. — Paris.
Philippe Auguste confirme la vente faite aux Templiers par Ansoud, frère de Philippe de Fayel, de divers biens sis à Laigneville et à Monchy [-Saint-Éloi] avec le fief de Guiard de Crouy, tenus du roi.
A. Original scellé en cire verte sur lacs de soie verte et rouge. Hauteur, 270 mm. ; largeur, 207 mm. Archives nationales, S 5041-5042 (ancienne cote 5043), liasse 1, n° 1.
B. Copie du xviie s., même liasse, n° 4.
Indiqué : E. Mannier, Les Commanderies du Grand prieuré de France, p. 572, d'après A.
In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri nos vidisse litteras Philippi de Faiel et Ansoldi fratris ejus, militum, sub hac forma :
« Ego Philippus, miles de Fayel, omnibus presentes litteras inspecturis salutem. Noveritis quod Ansoldus, frater meus, vendidit, assensu et voluntate matris nostre et M. uxoris mee, fratribus militie Templi quicquid habebat et de me tenebat apud Lengnevillam, et quamdam plateam que sita est apud Monci, et duodecim denarios censuales in eadem villa, et omnia in quibus participat cum Guiardo de Croi, et totum feodum Guiardi de Croy integre ; et ego a quo tenebat omnia predicta concedo fratribus supradictis quiete et pacifice inperpetuum possidenda. Insuper ego et frater meus supradictus concedimus hanc venditionem in perpetuum secundum jus guarantire, et petimus dominum regem Francorum a quo tenemus omnia predicta ut ista dignetur confirmare. Quod ut firmum et stabile inperpetuum perseveret, presentem paginam sigillorum nostrorum munimine confirmamus. Actum anno Domini M° CC° vicesimo secundo, mense februario. »
Nos igitur, de quibus dicta venditio movere dinoscitur, ipsam venditionem pro salute anime nostre et antecessorum nostrorum concessimus dictis fratribus perpetuo possidendam. Quod ut robur perpetue stabilitatis obtineat, presentem paginam sigilli nostri auctoritate et regii nominis karactere inferius annotato confirmamus. Actum Parisius, anno dominice Incarnationis M° CC° vicesimo secundo, regni vero nostri quadragesimo quarto, astantibus in palatio nostro quorum nomina supposita sunt et signa. Dapifero nullo. Buticulario nullo. Signum Bartholomei camerarii. Signum Mathei constabularii.
Data vacante (Monogramme) cancellaria.