1188, du 1er novembre, au 8 avril 1189. — Paris.

In nomine sancte et individue Trinitatis. Amen. Philippus Dei gratia Francorum rex. Ad regni culmen et excellentiam pertinere dignoscitur ecclesiarum jura defendere et que illis collata vel in posterum conferenda sunt preceptis irrefragabilibus confirmare. Pro quorum manutentionis intuitu, dilectorum ac venerabilium abbatis Calmensis ecclesie totiusque ejusdem loci conventus precibus annuentes, omnia et quecumque a patre nostro venerande memorie rege Ludovico et ceteris predecessoribus nostris benigne collata sunt eidem ecclesie et que etiam deinceps conferenda sunt, per devocionem concedimus et auctoritatis nostre precepto pariter confirmamus. Verum, ut ab hoc precepto nostro omnis procul abscedat ambiguitas, universa que immunicione proavi nostri designata sunt, per eadem verba subscribi et eorum ordine fecimus enumerari. Concedimus itaque et regali auctoritate precipimus, sicut a predicto patre nostro sancitum atque preceptum est, ut nullus omnino in parochia de Calmis et ejus monasterio et in omnibus aliis locis, tam in capite quam in membris, in suis possessionibus que, ab antiquis temporibus vel modernis, eidem sancto monasterio juste collata vel conferenda sunt, aliquam violenciam audeat inferre, nec homines ipsius parochie et ecclesie presumat distringere. Item homines in dicta parochia de Calmis et dicto monasterio commorantes ab omni banno nostro liberi erunt; ac etiam dictis religiosis abbati et conventui iterum confirmamus quod nunc et in perpetuum teneant et habeant magnam justiciam in omnibus locis inferius annotatis, videlicet parochiam de Calmis cum omnibus hamellis eidem parochie pertinentibus, et Cortomerias, Argenterias, Bellumvisum, Vernolium, Malum[re]versum, Arciacum, Houssenacum et eorum pertinencias, Oratorium, Repositorium cum hamellis dicte parochie, Fontanas Curcambardi, Bouciacum, Rogolium cum prioratu de Vernellis et Sancti Medardi, Parisiensis diocesis, et pertinenciis locorum eorumdem, Sanctum Justum versus Pruvinum, Ormellos, Fontanetum, Marlam, Turnonium cum Coullayo, Bodaycum, Bourboniam villam, Blomum ex altera parte riparie Secane, in quantum jus habent in dictis locis, tam in capite quam in membris, tam in omnibus granchiis et mansionibus, terris, pratis, ortis, vineis, nemoribus, rippariis pretensis a dicto Cortomerio usque ad Malum Reversum, ac omnibus feodis, retrofeodis, censibus, redditibus, costumis, corveiis, campipartibus, decimis, et omnia alia jura in quibuscumque locis regni nostri Francie sint situata vel constituta, dictis religiosis pertinentia, teneantur in manu mortua, sicut nobis apparuit et plenius vidimus contineri per auctenticas litteras illustrissimi patris nostri Ludovici. Et iterum, ex voluntate nostra et animi nostri, in favorem pietatis ecclesie et dictorum religiosorum et propter guerras quas passi sunt et substinuerunt, per potentiam nostram regalem laudamus, admortisavimus et volumus quod de cetero supradicta et declarata ab ipsis et eorum successoribus in perpetuum teneant in manu mortua, salvo per omnia regis jure a nobis penitus interdicto, si quod sit. Quod ut perpetue stabilitatis robur obtineat, munimento scripto commendari, sigilli nostri auctoritate muniri nostrique nominis subtus inscripti karactere roborari precepimus et fecimus. Actum publice Parisius, anno ab incarnatione Domini millesimo centesimo octuagesimo octavo, regni vero nostri decimo, astantibus in palatio nostro quorum nomina supposita sunt et signa. Dapifero nullo. Signum Henrici buticularii. Signum Ludovici camerarii. Signum Radulphi constabularii. Data per manum Guillelmi cancellarii.