1190, du 25 mars à juillet. — Paris.

In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri quoniam Ernaudus abbas et canonici Sancti Martini de Rericort in villa quadam que dicitur Wasquemolins nos collegerunt in hunc modum quod nos medietatem omnium reddituum et trium molendinorum et vivariorum ejusdem ville et tocius territorii habebimus, et canonici reliquam medietatem. Concesserunt quoque nobis canonici prefati quod omnes hospites suos de Sancto Martino et de Melaisvillari illuc venire et habitare facient sine reversione. Cum autem quidam milites patrie pro duobus ex molendinis illis in grangia Sancti Martini soleant percipere singulis annis quindecim modios bladi, nos canonicis predictis concedimus ut ex parte nostra annuatim capiant in molendinis septem modios et dimidium bladi sub hac conditione quod, si processu temporis contigerit ut canonici de dicta modiatione vel de parte illius modiationis, sive per elemosinam sive per emptionem absolvantur, emptio illa sive elemosina inter nos et canonicos equaliter dividetur, ita quod de parte nostra tantum cadet quantum de parte eorum. Ecclesia autem in molendinis illis molet sine moltura ea que necessaria erunt ad usum abbatie, et nos similiter ibidem molemus sine moltura ea que ad usum nostrum erunt necessaria quociens illuc venientes ibi jacebimus vel per eam transitum faciemus. Prepositus autem noster, quicumque sit prepositus et quociens mutabitur, fidelitatem dicte ecclesie faciet sicut et nostram quod ecclesie jus sicut et nostrum bene et fideliter servabit et de omnibus emendationibus ei rectam partem sicut et nobis faciet et medietatem ei tradet. Nos autem dictis canonicis concedimus curiam suam liberam in hunc modum quod, si in eadem villa ad opus nostrum edificare voluerimus, licebit nobis tantumdem terre capere et libere possidere. Quia vero dicti canonici in memorata villa nos benigne et liberaliter collegerunt, ne ex dono quod nobis fecerunt dampnum eis eveniat per malum dominium, concedimus eis et in verbo regio craantamus quod nec dictam villam, nec aliquid quod ad villam pertineat a proprietate nostra alienabimus, neque nos neque successores nostri reges Francie extra manum nostram mittemus. Procedente vero tempore nos, pietate moti super prefatam ecclesiam, medietatem bladi quod habebamus in molendinis quitavimus ita ei quod duas partes habet, nos vero ibi terciam, et de predictis quindecim modiis quorum medietatem solvebamus tantum terciam partem a modo solvemus et predicta ecclesia duas. Quam societatem nobiscum initam nobis et successoribus nostris in perpetuum tenendam predicti canonici concesserunt. Que omnia ut in posterum rata et illibata permaneant, presentem paginam sigilli nostri auctoritate ac regii nominis karactere inferius annotato precepimus confirmari. Actum Parisius, anno incarnati Verbi M° C° LXXXX°, astantibus in palatio nostro quorum nomina supposita sunt et signa. Signum comitis Teobaldi, dapiferi nostri. Signum Guidonis buticularii. Signum Mathei camerarii. Signum Radulphi constabularii. Data vacante cancellaria.

(Monogramme.)