1190, du 25 mars à juillet. — Senlis.

In nomine sancte et individue Trinitatis. Amen. Philippus Dei gratia Francorum rex. Attendentes genitorem nostrum pie memorie Ludovicum ecclesie nostre Beati Vincentii Sylvanectensis privilegium indulsisse quo ecclesia et ecclesie bona muniebantur ad petitionem Hugonis, illius loci tunc abbatis, juxta tenorem dicti privilegii eodem presenti scripto duximus annotare et que, post indultum a patre nostro privilegium, juste ac rationabiliter eidem ecclesie acquisita sunt confirmare. Notum igitur facimus universis presentibus pariter et futuris ecclesiam Beati Vincentii martyris in suburbio Silvanectensi, in alodio regali, a glorioso rege Francorum Philippo, proavo nostro, et matre sua Anna, pro anima Henrici regis, mariti sui, omnino liberam ex more et consuetudine regalium ecclesiarum, scilicet Sancte Genovefe Parisiensis Sanctique Franbaldi Sylvanectensis, fundatam, ipsamque ecclesiam, cum claustro et domibus, clericis et servientibus, in omni libertate perpetualiter permanere decernimus, ita etiam quod nec clerici nec eorum servientes per aliquam potestatem vel dignitatem nisi per ecclesie abbatem super aliqua re ullam exequantur justiciam. Ad eorundem vero clericorum sustentationem, ea que predicta Anna, ecclesie fundatrix, eidem ecclesie acquisivit et noster avus concessit ac ipsi clerici acquisierunt vel fideles Dei, tam clerici quam laici, pro animarum suarum remedio obtulerunt, ut quiete et libere ipsa ecclesia perpetualiter possideat precipimus, et maxime que ab avo nostro eis concessa scriptoque firmata esse cognovimus, videlicet hospites qui in atrio et circa eandem ecclesiam Sancti Vincentii sunt, scilicet cum furno et omnibus consuetudinibus hospitum; prebendas cum redditibus suis in ecclesiis Beate Marie, Sancti Reguli, Sancti Frambaldi et Sancti Evremundi de Credulio; anniversaria canonicorum ecclesie Beate Marie et Sancti Reguli que Clarembaldus, Silvanectensis episcopus, assensu clericorum eidem ecclesie dedit, et ecclesie Sancti Frambaldi que similiter ipsi ecclesie canonici Sancti Frambaldi, avi nostri assensu, quia nostra est ecclesia, concesserunt, ita quod in mutatione personarum vel prebendarum ecclesia Sancti Vincentii usque ad revolutum anni circulum redditus prebende habebit; hospites cum terra et censu juxta Muratum; tres hospites de dono Guarnerii militis in vico Parisiensi; olchias de censu nostro; terram de dono Alberti; terram de dono Petri Viatoris et aliam de dono Rainaldi, fratris ejus; terram de dono Pagani; terram emptam ab Odone; terram ad Fraxinum cum prato; terram de Berregis; terram de dono Durandi; terram de dono Hugonis; terram quam Fulbertus tenuit ab ecclesia Sancti Reguli; duos hospites apud Altum Montem; quatuor arpennos vinearum cum torculari; vineas de dono Radulfi Picot; vineas de dono Ebroini; vineas cum hospite de dono Gualterii Caperonis; villulam de dono Symonis Marescalci que vocatur Mala Genesta, que de censu episcopi est; medietatem fecdi quod Gualterus de Regione ab heredibus Bernerii tenebat, quod ipse et heredes sui pro ecclesia perpetualiter deservire debent; apud Alvers, villam regiam, ecclesiam ejusdem ville et decimam vini cum minutis decimis et redditibus gallinarum et anserum ipsius loci, que de jure et dominio regum fuerant, sicut ab avo nostro pro anima Philippi regis, proavi nostri, eis collata esse noscuntur; apud Ermenovillam, hereditatem Landrici Pereir; apud Prativillam, medietatem feodi de dono Huberti et viatoriam totam illius terre et totam avenam taxamenti; in Bernulia villa, hereditatem Ingelranni omnino liberam cum hospitibus et torculari, clausum de Ruppibus cum censu, vineam de Froe, duos gurgites in aqua cum rippis et terris que eis attinent; apud Tariniacum, vineam de censu nostro; de censu Cambii quadraginta solidos, de dono avi nostri viginti, de dono avie nostre viginti; in villa que vocatur Mansionale Blaum, dominium illius ville et omnem justitiam, curtem, culturas et duas partes omnium reddituum in hospitibus, terra, aqua et molendino et omnibus que ad villam pertinent; molendinum unum in villa que vocatur Gouvieux et hereditatem Radulfi Cardum; curtem de Lis cum terris ad eandem curtem pertinentibus; in territorio Barberie ville, viginti arpennos terre arabilis; in suburbio Silvanectensi, pratum regium quod dedit eis avus noster, in quo prato edificaverunt predicte ecclesie clerici curtem et hortum proprium. Precipimus etiam, quia nostra est ecclesia et ex toto, tam in sepultura quam in aliis, libera, ut omnes servientes nostri milites et burgenses ac familie eorum et alii qui ibi sepeliri deliberaverint, nullus eis contradicat. Confirmamus equidem quod hospites jam dicte ecclesie qui mercatores sunt et in foro nostro venalia opera exercent, hasbannum quod ceteri mercatores preposito nostro persolvunt, ipsi ecclesie persolvant, et nequaquam ab aliquo super hoc requisitionem vel gravamen sustineant; et quia ex eleemosina antecessorum nostrorum et nostra ipsa fundata est ecclesia, concedimus ut in terra et hospitibus omnem justiciam predicta ecclesia habeat et insuper vinagium, foragium et ceteras consuetudines quas hactenus tenuit et tenet, in pace perpetualiter possideat. Preterea sextam partem decime de Branio et cetera de dono Guillelmi de Gonessa, sicut in carta Gaufridi, Sylvanectensis episcopi, continetur, et decimam de Rarai et alia que Guillelmus de Gallanda sepedicte ecclesie dedit, sicut in litteris ipsius Guillelmi continetur, et decimam de Nully de dono Odonis de Curly, sicut in litteris Guillermi de Merloto continetur. Que omnia ut perpetuam sortiantur stabilitatem, presentem paginam sigilli nostri auctoritate ac regii nominis karactere inferius annotato precipimus confirmari. Actum Sylvanectis, anno ab incarnatione Domini millesimo centesimo nonagesimo, regni nostri anno undecimo, astantibus in palatio nostro quorum nomina supposita sunt et signa. Signum comitis Theobaudi, dapiferi nostri. Signum Guidonis buticularii. Signum Mathei camerarii. Signum Radulphi constabularii.

Data vacante (Monogramme) cancellaria.