1181, du 5 avril au 31 octobre. — Senlis.
Philippe Auguste fait connaître à quelles conditions les moines de la Charité l'ont associé à leurs droits sur Valigny.
A. Original perdu.
B. Vidimé en 1221-1222 dans l'acte catalogué par L. Delisle sous le n° 2095 et vidimé lui-même, sous le sceau de la prévôté de Cenquoins, le 22 mars 1333 (n. st.). Ce dernier vidimus nous est connu par une copie faite pour Lambert de Barive. Bibliothèque nationale, latin 9884, fol. 47 v°.
In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri quia inter nos et monachos Karitatis convenit quod ipsi in quamdam eorum villam nomine Valliniacum nos collegerunt hoc modo: monachi omnes redditus et consuetudines quas ad presens in prefata villa habent, semper habebunt, et nos, de qualibet domo in qua ignis fuerit, unum sextarium avene et duodecim denarios de censu singulis annis habebimus, si dominus domus tantum dare potuerit; et, si tantum dare non potuerit, plenam minam avene et sex denarios habebimus singulis annis. Istud vero disponetur ad arbitrium quatuor proborum hominum qui ad hoc eligentur cum preposito. Prepositus autem ville illius a qualibet domo ville ubi ignis fuerit unum quartellum avene habebit, et fidelitatem monachorum faciet sicut et nostram. Propter hoc inter nos convenit ut monachi medietatem omnium incrementorum, omnium forifactorum et justitie, sicut et nos aliam, habeant integre. Ad hoc promisimus et garantavimus ut villam illam nullatenus extra manum nostram mittamus nec successores nostri reges Francie, imo eam cum universis inhabitantibus et inhabitaturis in protectionem et custodiam nostram, salvo alieno jure, capimus. Que omnia ut perpetuam stabilitatem obtineant, presentem paginam sigilli nostri auctoritate et regii nominis karactere inferius annotato precipimus confirmari. Actum Silvanecti, anno incarnati Verbi millesimo centesimo octogesimo primo, regni nostri secundo, astantibus in palatio nostro quorum nomina supposita sunt et signa. Signum comitis Theobaldi, dapiferi nostri. Signum Guidonis buticularii. Signum Mathei camerarii. Signum Radulphi constabularii.
Data per manum Hugonis cancellarii.