1192, du 5 avril au 31 octobre. — Lorris.
Philippe Auguste confirme les mesures prises par son père Louis VII, pour mettre fin aux vexations que le vicomte de Polignac faisait souffrir à l'église du Puy.
A. Original perdu.
B. Copie du xviie s., Archives nationales, H4 3222.
C. Analyse, Bibliothèque nationale, Collection de Languedoc, vol. 39, fol. 283.
a. A. Jacotin, Preuves de la maison de Polignac, t. I, p. 133, n° 80, d'après B.
In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri quod, cum ecclesia Podiensis que ad regiam jurisdictionem pertinere dinoscitur, multis oppressionibus, vexationibus et molestiis subjacuerit et damna gravia et enormia a Pontio, vicecomite Podempniaci, et predecessoribus suis pertulerit, genitor noster, venerande memorie rex Ludovicus, ista considerans, ecclesie compatiens et patrie providere volens, pro communi commodo et pace perpetua obtinenda quin aliter firma pax inter ecclesiam et vicecomitem esse non poterat, habita consideratione et consultatione procerum suorum et communicato consilio religiosorum episcoporum et aliorum virorum, donavit et concessit Aniciensi ecclesie et Petro, ejusdem ecclesie episcopo, et successoribus suis ut, nomine pedagii, tresdecim denarii Podiensis monete de unoquoque troussello auctoritate regia, infra civitatem Aniciensem accipiantur; quorum quinque percipiat episcopus, tres ecclesia, vicecomes vero, permissione patris nostri et ecclesie, quinque percipiat ab episcopo in feudum; sed neque vicecomes, neque filii sui, neque successores eorum, neque aliquis ex parte suorum pedagium augere vel leydam, nec alibi pedagium exigere, nec pro pedagio aliquid accipere, etiam ultro oblatum, ullo modo presumant. Huic autem promptissime liberalitati sue ecclesie Aniciensi exhibite genitor noster perpetuam firmitatem attribuens, compositionem hanc factam inter Petrum, Aniciensem episcopum, et ecclesiam et Pontium, vicecomitem Podempniaci, et corroboratam sacramento predicti vicecomitis et filiorum suorum Eraclii, Stephani de Rochasavina et Hugonis, canonici Brivatensis, et multorum aliorum militum approbavit et confirmavit et in perpetuum custodiendam decrevit quod, si vicecomes vel heres ejus aut aliquis suorum adversus ea que prediximus et adversus compositionem predictam et juramentum prestitum venire presumpserit, et commonitus ab Aniciensi episcopo aut ejus successoribus, infra viginti dies emendare noluerit, non solum illa parte pedatgii quam pater noster et ecclesia, pro remedio pacis, ipsam habere promiserunt, et omni feudo quod a nobis habet privetur, verum etiam jus integrum quod ex transactione Parisius facta coram patre nostro consecutus fuerit Aniciensis episcopus, tam in castellis quam in leydis et moneta et aliis usaticis civitatis Aniciensis, predicto episcopo et ejus successoribus conservetur; et nihilominus a patre nostro factam pedatgii donationem episcopo et ecclesie in perpetuum et sine diminutione habeant et ejus commodis perfruantur. Preterea prohibuit genitor noster et modis omnibus contradixit ne liceat vicecomiti nova castra construere, sine assensu et voluntate Podiensium episcopi et ecclesie. Que omnia, sicut pater noster concessit et confirmavit, nos similiter iterum, ad petitionem venerabilium virorum Anicii et fidelis nostri Ainardi, Aniciensis episcopi, et Petri, ejusdem ecclesie decani, et totius capituli, concedimus et confirmamus et, ut perpetuam stabilitatem obtineant, presentem paginam sigilli nostri auctoritate et regii nominis caractere inferius annotato precepimus communiri. Actum Loriaci, anno incarnati Verbi millesimo centesimo nonagesimo secundo, regni nostri anno tertio decimo, adstantibus in palatio nostro quorum nomina supposita sunt et signa. Dapifero nullo. Signum Guidonis buticularii. Signum Matthei camerarii et constabulario nullo.
Data vacante (Monogramme) cancellaria.