1182, du 1er novembre, au 16 avril 1183. — Montlhéry.

In nomine sancte et individue Trinitatis. Amen. Philippus Dei gratia Francorum rex. Nichil altius animo nostro gerimus impressum quam ut sancte recordationis domini et patris nostri regis Ludovici voluntatem studeamus modis omnibus implere et opera ipsius, presertim que circa Dei ecclesias juste et devote disposuit, auctoritate regia imperpetuum confirmare. Eapropter omnibus tam futuris quam presentibus notum esse volumus quod, ex autentica et nobis semper reverenda patris nostri constitutione, sigillo ipsius et sacri nominis ejus karactere consignata, didicimus quatinus ipse, in causa que vertebatur inter ecclesiam Sancte Genovefe et homines de Rodoniaco super servitute eorumdem, secundum consuetudinem regni Francorum judicavit ut, quia homines hospicietum et colonatum ecclesie cognoscebant et, liberos se dicentes, servitutem negabant, in curiam abbatis cujus erant hospites irent et ibi ecclesia, si eos habere vellet, per duellum servos esse suos approbaret. Die vero eis ab abbate assignata, predicti homines in curiam ejus iverunt et ibi, coram multis et magnis viris, cum abbas eos ecclesie sue servos esse, sicut judicatum fuerat, approbare paratus esset idque sepius eis offerret, homines sese non propter hoc venisse neque diem propter hoc sibi assignatum fuisse dixerunt, et ita nullam de servitute sibi objecta defensionem in se suscipere voluerunt; utraque autem parte concedente et volente ut, quicquid lucri vel dampni alterutra partium inde habere deberet, per curiam domini et patris nostri susciperet, ad ipsum in palatium ejus tam abbas quam predicti homines reversi sunt. Ipse autem rex, ex testimonio multorum et magnorum virorum, fidelium suorum, qui ad hoc audiendum ex parte sua missi fuerant, rem ita fuisse et homines in defensione servitutis sibi objecte penitus defecisse cognoscens, consilio baronum suorum, scilicet comitis Theobaldi, dapiferi nostri, et comitis Roberti, fratris sui, et aliorum plurium, juramenta [eorum] qui defectum hominum et injusticiam viderant et quorum auctoritati etiam in majoribus credendum esset, suscepit, ut deinceps homines de Rodoniaco ecclesie Sancte Genovefe subjecti sint sicut servi dominis suis precepit et, ne aliquam in posterum inde questionem moveant modis omnibus prohibuit. Hii autem sunt qui, tactis sacrosanctis Evangeliis, coram ipso domino et patre nostro rege juraverunt: Hugo, abbas Sancti Germani de Pratis; Barbadaurus, decanus ecclesie Sancte Marie Parisiensis; Philippus, archidiaconus Sancte Marie Parisiensis; Symon de Sancto Dyonisio; Anselmus, decanus Sancti Marcelli; Petrus, decanus Sancti Germani Autisiodorensis. Cumque multi alii tam clerici quam laici, milites scilicet, servientes et burgenses, idem jurare vellent, ipse dominus et pater noster rex eorum sacramenta qui juraverant sufficere dixit. Nos tamen, religiosi et justi principis patris nostri constitutionem et sententiam approbantes, auctoritate regia nobis a Deo concessa ipsam confirmamus, et ut deinceps homines de Rodoniaco ecclesie Sancte Genovefe subjecti sint sicut servi dominis suis precepimus, et ne aliquam inde inposterum questionem moveant, modis omnibus prohibemus. Ut autem predicta jussio domini et patris nostri simul et nostra perpetuam obtineant firmitatem et nullo modo in posterum valeant retractari, sigilli nostri auctoritate ac regii nominis karactere subter annotato presentem cartam fecimus confirmari. Actum apud Montem Lethericum, anno incarnati Verbi M° C° LXXX° secundo, regni vero nostri anno quarto, astantibus in palatio nostro quorum nomina supposita sunt et signa. Signum comitis Theobaldi, dapiferi nostri. Signum Guidonis buticularii. Signum Mathei camerarii. Signum Radulphi constabularii.

Data per manum (Monogramme) Hugonis cancellarii.