[1201, du 1er novembre, à octobre 1208.].
Philippe Auguste confirme toutes les libéralités faites à l'abbaye de Livry par lui-même et par d'autres, substitue aux 40 livres de rente qu'il s'était jadis engagé à lui constituer une rente de 16 muids de blé sur sa grange de Gonesse et y ajoute tous les biens sis à Livry que Guillaume de Garlande avait donnés aux chanoines de Saint-Vincent de Senlis et que le roi avait rachetés aux chanoines.
A. Original perdu.
B. Copie par Duchesne, Bibliothèque nationale, Collection Duchesne, vol. 76, fol. 385.
C. Copie du xviiie siècle, Archives nationales, K 179, liasse VI, n° 3.
a. Fragment dans la Gallia Christiana, t. VII, col. 828.
Texte établi d'après BC.
In nomine sancte et individue Trinitatis. Amen. Philippus Dei gratia Francorum rex. Sicut opus est pietatis ac misericordie loca Deo dicata augere beneficiis, ita pium esse censemus beneficia eisdem collata scripto regio communire et in posterum integra conservare. Quod utique attendentes presenti pagine commendanda duximus beneficia que abbatie de Livriaco in honorem beatissime Dei genitricis Marie fundate nos et alii contulimus in perpetuum ob remedium anime Theobaldi de Garlanda qui in eadem ecclesia sepultus requiescit. Noverint igitur universi presentes pariter et futuri quod, in excambium quadraginta librarum redituum quas, pro consideratione Odonis Parisiensis episcopi et Galteri junioris camerarii nostri debebamus assignare ecclesie Beate Marie de Livriaco, eidem ecclesie et canonicis ibidem Deo servituris in perpetuum damus et assignamus sexdecim modios bladi nostri singulis annis percipiendos in tempore messis in grangia nostra de Gonessa ad mensuram Parisiensem. Damus insuper eidem ecclesie, in qua abbas et conventus constituti sunt totam emptionem nostram quam fecimus ab ecclesia Sancti Vincentii Silvanectensis de illis videlicet que Guillelmus de Garlanda pater donaverat apud Livriacum de assensu Idonee uxoris sue et filiorum suorum Guillelmi, Roberti et Theobaldi, canonicis Sancti Vincentii, que quidem, sicut ex charta ejusdem Guillelmi plenius intelleximus, hic dignum duximus exprimenda. Dedit enim memoratus Guillelmus de Garlanda dictis canonicis Sancti Vincentii Silvanectensis domum cum curia omnino liberam et quietam, ita ut infra septa canonicorum vinagium, roagium, foragium, boagium et omnes alias consuetudines libere in perpetuum dicti canonici possiderent et ut in omni justitia dicti Guillelmi hujusmodi consuetudines ab eis in eorum negociis non exigerentur et postea tertiam partem molendinorum suorum de Livriaco et duos arpennos vinee et duo arpenta pratorum et LX arpenta bosci et commune usuarium in nemore et in territorio Silvanectensi in villa que dicitur Raraium omnem decimam quam predictus Guillelmus ante possederat et omnem decimam que in futuro de novalibus ejusdem Guillelmi erat exitura, ita ut per servientes ejusdem Guillelmi et canonicorum campipars Guillelmi et decima canonicorum in unum acervum adducerentur et in duas partes equaliter dividerentur ; quibus divisis, servientes canonicorum quam vellent partem eligerent et haberent. Concesserat etiam idem Guillelmus predictis canonicis ut quicquid de sue justitie potestate sive de feodis sive de censualibus et quibuslibet possessionibus vel emptione seu donatione fidelium vel alio quolibet modo rationabili possent acquirere pacifice tenerent et quiete. Ad posterum etiam volumus notitiam pervenire quod memoratus de Garlanda qui in eodem loco habet sepulturam, dicte ecclesie in qua abbas et conventus constituti sunt contulit XIII libras reddituum apud villam que dicitur Essarta. Guillermus autem de Garlanda, frater ejus, dedit eidem ecclesie furnum de Livriaco ita quod nullus furnus ibidem postmodum construeretur ; et si quem postmodum fieri contingeret apud Livriacum, dicte esset ecclesie. Eidem etiam dedit centum solidos annuatim habendos in censu de Livriaco et tria arpenta pratorum apud Gornay, et apud Livriacum terram ubi abbatia modo sita est. Matheus autem de Malliaco, sicut ex litteris ipsius cognovimus, assentiente Matildi, uxore sua, de assensu etiam et voluntate nostra, in perpetuam elemosinam dedit predicte ecclesie Beate Marie de Livriaco furnum quemdam situm Parisius prope Sanctum Medericum, in vico Sancti Martini, cum ipsa domo et horto eidem domui contiguo, ab omni exactione et consuetudine et subjectione liberos et quittos, excepto eo quod decem et octo denarios censuales ecclesie Sancti Mederici annuatim inde reddantur ; dedit et eidem ecclesie quinque arpennos vinearum apud Capellam sitos similiter ab omni exactione, consuetudine et subjectione liberos et quittos, excepto quod tres solidi censuales et quatuor denarii in octavis beati Dionysii communi censui annuatim reddantur. Ad hec sicut ex carta Johannis de Gisorcio cognovimus, idem Johannes predicte ecclesie Beate Marie de Livriaco et canonicis ibidem Deo servientibus dedit et concessit in perpetuam elemosinam XX solidos annui redditus in furno suo de Charcio in festo sancti Remigii percipiendos. Preterea ex litteris Johannis de Pomponio intelleximus quod idem Johannes supradicte ecclesie de Livriaco, ob remedium anime sue et pro anima Theobaldi de Garlanda dedit in perpetuam elemosinam XIII arpennos terre extirpande ad perticam de Oroer in livreiz de Brou libere et absolute possidendos. Droco quoque de Melloto, constabularius noster, eidem abbatie dedit centum solidos reddituum apud Domnum Martinum. Robertus autem Malevicinus dedit eidem VI libras reddituum in decima sua apud Sarclaium de assensu Guillelmi de Garlanda de quo eam tenebat, ita quod si decima illa non valeret annuatim VI libras, defectum ejus alibi perficere teneretur ; et preter hec dedit eidem XX arpennos bosci juxta Livriacum extirpandos et colendos. Que omnia, sicut superius memorata sunt, ut perpetue stabilitatis robur obtineant, sigilli nostri auctoritate et regii nominis caractere inferius annotato presentem paginam confirmamus. Actum Parisius, anno ab incarnatione Domini M°CC° (sic), regni nostri anno XX (sic), astantibus in palatio nostro quorum nomina supposita sunt et signa. Dapifero nullo. Signum Guidonis buticularii. Signum Mathei camerarii. Signum Droconis constabularii.
Data vacante cancellaria, per manum fratris Garini.