1202, du 14 avril au 31 octobre. — Dun-le-Roi.
Philippe Auguste confirme les coutumes jadis accordées par le roi Louis VII, Raoul seigneur d'Issoudun et Bérard de Lignières au village de Saint-Germain[-des-Bois], alors dépeuplé et ruiné par les exactions de leurs agents et l'insupportable excès des charges.
A. Original perdu.
a. G. de la Thaumassière, Coutumes locales du Berry, p. 77.
b. Ordonnances des rois de France, t. XI, p. 285, d'après a.
c. Nouveau coutumier général, t. III, p. 1003.
Indiqué : Ach. Luchaire, Études sur les actes de Louis VII, Catalogue, n° 789, d'après l'acte de Philippe Auguste (aujourd'hui perdu).
In nomine sancte et individue Trinitatis. Amen. Philippus Dei gratia Francorum rex. Notum facimus universis presentibus pariter et futuris quod bone memorie Ludovicus genitor noster, quondam Francorum rex, et Radulphus dominus Exoldunensis et Berardus de Lyneriis villam quandam in castellania Duni que dicitur Sanctus Germanus, in solitudinem et vastitatem per infestationem malorum servientium et oppressionem gravium consuetudinum [reductam], liberam fecerunt ad consuetudines istas.
Homines qui colunt terram que vocatur de feodo Sancti Petri, cum sex vel cum octo bobus vel cum integra carruca, dabunt tantum duo sextaria avene et duodecim denarios ; qui vero cum quatuor aut tribus bobus, tres minas avene et duodecim denarios et, ad Natale Domini, panem unum et denarium unum et tres gallinas ; et qui colunt terram cum duobus bobus, dabunt unum sextarium avene et alias predictas consuetudines.
Tres prepositi erunt in terra ista, qui communiter accipient unam quartam hordei.
Homines hujus ville accipient in nemore quidquid eis necessarium fuerit ad edificationem domus et ad carrucam, ad quadrigas, et ad segetes claudendas, et accipient nemus mortuum ad comburendum ; et porci eorum nullo tempore abstinebunt nec custodientur a nemore, sed panagium reddent sicut alii.
Et quodcumque forisfactum fuerit, homines in villa placitabunt, non extra villam illam ; et si duellum vel alia justitia evenerit, ubi fiet terminabitur.
Et cuicumque trium prepositorum fecerint homines pactum de aliquo placito, trium virorum commune erit ; et homo qui pactum fecerit pro placito vel pro forisfacto, liber erit et a placito et a forisfacto.
Et guerra si forte evenerit inter dominos hujus terre, tres prepositi eorum et qui cum eis erunt et qui ad eos venerint et ipsi homines terre semper erunt in pace, nec ab aliqua parte tenebuntur, nec unquam vocabuntur ab aliquo dominorum, nec in exercitum ibunt vel in expeditionem.
Nos autem, ad imitationem patris nostri, hanc libertatem ville Sancti Germani hominibus sicut prescripta est concedimus.
Quod ut perpetuum robur obtineat, presentem paginam sigilli nostri auctoritate [ac] regii nominis charactere inferius annotato precepimus confirmari. Actum apud Dunum, anno incarnati Verbi millesimo ducentesimo secundo, regni vero nostri anno vigesimo tertio, astantibus in palatio nostro quorum nomina supposita sunt et signa. Dapifero nullo. Signum Guidonis buticularii. Signum Mathei camerarii. Signum Droconis constabularii.
Data vacante cancellaria, per manum fratris Garini. (Monogramme.)