1203, du 6 avril, au 31 octobre. — Paris.
Philippe Auguste fait savoir à quelles conditions Savary, prieur, et le couvent de la Charité ont vendu à Isembard, prieur de l'Hôpital de Jérusalem en France, et aux autres frères de cette maison tout ce qu'ils avaient à Châteaubleau, au Corroy et à Coutençon.
A. Original scellé en cire verte sur lacs de soie rouge et verte. Hauteur 260 mm. ; largeur 267 mm. Archives nationales, S 5162, n° 11.
a. J. Delaville-Le-Roulx, Cartulaire général de l'ordre des Hospitaliers, t. II, p. 23, n° 1177.
In nomine sancte et individue Trinitatis. Amen. Philippus Dei gratia Francorum rex. Noverint universi presentes pariter et futuri quod frater Savaricus, prior Karitatis, et conventus monachorum ejusdem monasterii vendiderunt et tradiderunt fratri Isembardo, priori domus Hospitalis Jerosolimitani in Francia et aliis fratribus ejusdem domus, pro duobus milibus librarum et centum libris Parisiensis monete, quicquid habebant in hospitibus, in terris, in nemoribus et in jure aliquo apud Castrum Belioth et apud Coriletum et apud villam que Contentio nominatur, tali conditione quod quitant eis in perpetuum quicquid habebant in locis superius nominatis. Si qua persona ecclesiastica vel secularis exceptis illis violenter vel in fraudem aliquid pertinens ad quemlibet trium predictorum locorum sibi vendicavit et ipsi Hospitalarii juste et canonice illud revocare potuerint, predicti monachi quitant eisdem Hospitalariis ab ipsis perpetuo possidendum. Ipsi autem Hospitalarii non poterunt recipere aliquem hominum seu feminarum eorumdem monachorum in aliis terris ipsorum manentium, si ad dominium trium predictorum locorum in fratres Hospitalis per eos collatum voluerint transmigrare. Si autem contigerit aliquem hominum ipsorum ad aliud quam ipsorum Hospitalariorum dominium transire et postmodum ad quempiam locorum supranominatorum transmigrare, omnia tenementa et omnes censivas et quicquid possidebant in terris ipsorum homines illi in discessu suo, de jure et absque reclamatione aliqua Hospitalariorum et hominum illorum, saisire poterunt monachi et jure perpetuo possidere. Nullum hominum eorum sine assensu ipsorum prioris videlicet et conventus de Karitate poterunt ipsi Hospitalarii retinere in dominio predictorum locorum. Si quis dixerit aliquem trium locorum illorum penes se per litteras monachorum ab ipsis titulo emptionis sive locationis aut pignoris obligatum, ipsi tenebuntur expedire et liberare ipsis Hospitalariis, sed de omni alia guarantia coram ecclesiastico vel seculari judice facienda non poterunt dicti monachi de jure compelli, nisi ad ferendum testimonium cum sumptibus eorumdem Hospitalariorum. Usuarium quod habebat domus Beate Marie Senonensis in nemoribus de Corileto ipsi Hospitalariis in perpetuum quitant. Et sciendum quod si qua exceptio vel actio eisdem monachis competit ad recuperandum vel petendum prenominatas villas et dictam granchiam eo quod minus legitime vel sollempniter predicta venditio vel emptio sit celebrata, monachi illi actioni et exceptioni omnino renuntiant. Bladum quod domus de Cruce apud Sanctum Justum per voluntatem et dispositionem ipsorum monachorum recipere solebat, scilicet quinque sextarios, monachis perpetuo remanebit et illud domus de Meso recipiet annuatim. Quod ut perpetuum robur obtineat, sigilli nostri auctoritate et regii nominis karactere inferius annotato sicut continetur in autentico dicti Savarici prioris de Karitate et conventus ejusdem loci, presentem paginam confirmamus. Actum Parisius, anno ab incarnatione Domini M° CC° tercio, regni nostri anno vicesimo quarto, astantibus in palatio nostro quorum nomina supposita sunt et signa. Dapifero nullo. Signum Guidonis buticularii. Signum Mathei camerarii. Signum Droconis constabularii.
Data vacante (Monogramme) cancellaria, per manum fratris Garini.