1205, du 10 avril au 31 octobre. — Anet.
Philippe Auguste notifie et confirme la constitution de dot d'Isabelle, fille de Guillaume le chambellan de Tancarville, mariée à Adam, fils de Gautier le Jeune, chambrier du roi.
A. Original perdu.
B. Copie du xiiie s., (formules abrégées), Registre E de Philippe Auguste, fol. 221 v°.
C. Copie du xiiie s., Registre F de Philippe Auguste, fol. 178 v°, d'après B.
D. Copie du xviie s., Bibliothèque nationale, Collection Baluze, vol. 65, fol. 259, d'après B.
a. E. Martène, Amplissima collectio, t. I, p. 1051, d'après B ou C.
Indiqué : A. Deville, Histoire du château de Tancarville, p. 133.
Texte établi d'après B.
Philippus etc. Notum etc. quod Guillelmus cambellanus de Tanquarvilla dat et concedit cum Ysabella filia sua Ade, filio dilecti et fidelis nostri Galterii junioris, camerarii nostri, in maritagium ducentas terre libratas monete currentis in terris et redditibus apud Villers et duo feoda militum in eadem terra, tali conditione quod, si terra quam idem Guillelmus cambellanus habet ibidem non poterit sufficere ad perficiendas illas ducentas libratas, quod de hoc deficiet assignabit dictus Guillelmus eidem Ade in terra quam habet viciniorem eidem ville. Tenementum autem, quod Alexius de Villers habet ibidem in laico feodo, extra illam assignationem eidem Guillelmo remanebit. Si autem ipsum Guillelmum cambellanum contigerit habere masculum heredem ex Aalis uxore sua desponsata, vel ex alia desponsata, alias ducentas libratas terre predicto Ade dabit et assignabit apud Montevillam et in honore ejusdem ville et duo feoda militum, si Marsilia sororia ipsius esset mortua, si autem vixerit illas ducentas libratas et duo feoda militum assignabit eidem Ade apud Turvon et Hostrean usque dum dicta Marsilia moriatur, et post ejus decessum iste ducente librate et duo feoda militum assignabuntur eidem Ade, sicut dictum est apud Montevillam et in honore illius ville, sed has ducentas libratas ultimo determinatas per totam vitam suam tenebit idem Guillelmus cambellanus, et post decessum ejus predictus Adam illas quiete habebit, sicut predictum est. Si vero contigerit Ysabellam, filiam ipsius, mori sine herede de predicto Adam, terra preassignata libere et quiete redibit ad eundem Guillelmum, salvis mobilibus que de eadem terra erunt. Et si contigerit dictum Adam mori sine herede de predicta Ysabella, terra predicta remanebit libere et quiete ad predictam filiam ejusdem Guillelmi, salvis mobilibus illius terre. Ut autem hec supradicta perpetuam obtineant stabilitatem, nos ad peticionem utriusque partis sigilli nostri auctoritate et regii nominis caractere inferius annotato ad usus et consuetudines Normannie presentem paginam salvo jure nostro confirmamus. Actum Aneti, anno Domini M° CC° quinto, regni nostri anno vicesimo sexto.